BENGALURU, NOVEMBER 25 : Purana Union Railway Minister CK Jaffer Sharief toh Monday pujutte Bengaluru, Karnataka laga Hospital te murijaise koi kena, Karnataka Pradesh Congress Committee President Dinesh Gundu Rao pora janaise. Aro tai mura time 85 sal toh huikena thakise koise.
Friday din tai neju laga kari bitorte kusibole kura time te ajanak pora kerise. Etu bejete tai Bengaluru laga Private Hospital te sabole jaa huise. Eneka huikena tai murijaa huise koise.
Etu Veteran Congress leader aro purana Union Minister toh Union Railway Minister nemite 1991 sal pora 1995 sal dak thaka laga ase. Etubi PV Narasimha Rao sorkar bitorte. Aro tai Veteran Parliamentarian nemite Bengaluru North aro Bengaluru Rural jaka pora huikena thaka laga ase. Aro tai Lok Sabha member nemite 8 bar hua laga ase. Huilebi aro tai ke 2014 General Elections te toh Congress Party ticket debole nakurikena thakise. Eneka huikena tai Bengalore Central jaka pora harijaa laga ase koise.
Tai mura nemite Karnataka Congress chief Dinesh Gundu Rao; Prime Minister Narendra Modi; Congress Chief Rahul Gandhi; President Ram Nath Kovind; Purana Karnataka Chief Minister; Karnataka Deputy Chief Minister G Paranmeshwara; Purana President Pranab Mukherjee aro tusera alak-alak besi jun Political leaders kan pora twitter te kotha lekhe kena khor manu kan ke mondukh laga kotha aro tai laga bhal kam kan nemite bhal kotha janaide thakise koise.
Add Comment