Dimapur: Nagaland Cricket Association (NCA) pora media laga section te bodnam koriya nisina aalag states khan pora cricket teams khan juniya te ekko kher kanuni laga kam koriya nai, tate social media bi milaikena.
Etu NCA pora rishwat lowa laga khobor ke jawab korise, tate konoba aanjan manu pora bodnam korise ki aalag states khan laga cricket teams te seat wada korise, tate aro Nagaland Cricket Association laga naam bi milaikena thakise.
“Nagaland Cricket Association aro tai khan laga officials khan toh etu mamla khan laga khobor najani kena thakise hoilebi etu mamla toh ekdam dangor kotha karne mon diye kena sai ase,” NCA vice president P Bendang Jamir pora ekta press release te koise.
Etu NCA pora koise ki etu mamla toh Cricket Board laga Anti-corruption Unit te loikena jaise aro wada korise ki investigating agencies khan ke pura modot dibo aro iccha dibo koikena. Tai khan pora cricket aro sport fraternity ke wada korise ki tai khan laga association toh ekko kher kanuni kam logote milikena nai.
Etu NCA pora bi koise ki State team nimite juniya laga procedure toh kenika kheliye etu laga hisab pora sobse bhal khan ke saikena juniye. Sob players khan kono Nagaland laga naam te ki level laga cricket khelilebi, tai khan toh khali transparent online registration system pora naam lekhiye, aro tate board pora sob documents aro aalag miliya mamla khan ke jaach korikena sai, tai khan pora koise.
State team laga sob coaches aro support staff khan toh sitha board pora juniye aro sob players khan toh khali board laga online registration system te state local residence aro inhabitant, birth certificate aro aalag laagiya documents khan submit koriya bicchete maaniya bicchete hi juniye, NCA Vice President pora koise.
Selection nimite ekko kher kanuni laga kam koriya laga ekko sawal nai koikena, etu association pora koise ki tai khan toh khel toh ekdam bhal neum pora othaidibo laga iccha ase aro local players khan ke othaibole besi kosish bi korise, tate besi diktari aro dukh thakikena bi.
“Moi khan laga association ke represent koribo nimite players khan laga haat pora rishwaat lowa laga ekko sawal nai hoilebi juti konoba manu nahoile majote kam koriya manu khan pora loise koile kanu laga nijete thakiya nisina thik sajai dibole laage,” tai khan pora koise.
NCA officials khan logote khilaf social media te misa laga khobor khan pheli ase koikena bodnam korikena, etu release te koise ki kanun laga hisab pora etu nisina misa khobor phela manu khan logote khilaf sajai dibo.
Add Comment