Nemanja Matic pora €70,000 donate korise

Agencies, 22 September: Pura duniya manu khan Manchester United midfielder Nemanja Matic logode ektum phal pora janeh. Kelay koile tai football de ektum phal khela karni. Hoilebe etu 30-sal khelari pora manu khan ke morom kora toh etu par jahne paise. Serbian news station B92 pora khobor janaideya hesab de, Serbian footballer Nemanja Matic pora jar sal Dusan Todorovic logode motob koribo karni €70,000 donate korikena ase koise. Dusan Todorovic logode poisa deya toh, cancer bemari pora life bachibo karni deya laga ase. Reports hesab de, Dusan toh cancer, neuroblastoma pora dukh pai ase koise aro tai treatment karni  Barcelona de jabo lagibo koise. Report hesab de, Matic pora poisa toh naam na-janaide kena donate kora ase koise. Hoilebe tai laga baba Aleksandar Todorovic pora etu poisa toh Matic pora deya ase koi-kena janaisekoise. March 2016 time de Matic toh tai johnom powah Serbian bosti de sob poisa de-deya thakise koise. Matic toh Chelsea nemide 121 par olai kena ase. Tai 2017 de, Manchester United logode deal sign kora thakise aro etu time pora Red Devils nemide 39 par olai kena ase. Tai Serbia football team nemide 45 par olai kena ase aro etu team toh international football de ekta regular team members ase.