2025 te retire hoithaka 1990 NSS Batch laga 11 officer laga naam te, Nagaland Secretariat Service Association (NSSA) para 29 January 2025 te Secretariat Conference Hall te ekta farewell programme organise kurisiley.
Retire hoithaka members khan laga behalf te kotha koikina, Finance Department laga Joint Secretary Neikeduolie para NSSA ke taikhan laga naam te etu programme organise kora aro Government of Nagaland ke retire hoithaka manu khan ke acknowledge kora nimitey dhanyabad janaisey. Taikhan laga service laga bari te koithaka homoitey, etu retire hoithaka officer(Neikeduolie) para koisey ki etu 1990 batch tu NSS service te 1990 te NPSC exam clear kurikina gusisey. Aro 35 years bhitor te taikhan kinaka clerk laga post para 1st class officer laga post te promote hoijaisey etu laga bari te share kurisey. Tai para etu bi share kurisey ki taikhan laga mixed career service homoitey, taikhan para statehood pabole ageyte aro statehood pa picheyte laga homoi laga dedicated officer khan, kun taikhan laga mentor thakisey, taikhan logotey interaction kurikina aro taikhan laga under te kaam kurikina bisi saal te bisi knowledge paisey.
Tailaga iccha laga bari te koikina, Neikeduolie para etu Associan laga members khan ke hodai nijor ke etu yaad dilabole koisey ki taikhan laga appointment aro posting tu public khan laga kaam nimitey aro taikhan ke seva kuribole nimitey issue aro notifu kora laga asey. Tai para etu members khan ke taikahn majotey respect thakibole aro nijor ke dusra para opor aro dusra para nichey bi nabhabibole koisey. Kielmaney taikhan sob bi qualified asey aro NPSC exam laga through etu service te gusisey. Senior officer khan ke mention kurikina, Neikeduolie para taikhan ke faisla luwa te bahadur aro tagra hobole aro taikhan nijor ke dusra para nichey bhabna kora laga attitude bi bodli kuribole koisey, kilemaney taikhan ke junior assistant khan ke dangor responsibility dibole assign kurikina asey. Tai para taikhan ke kaam te regular, sincere hobole aro taikhan laga chair aro table khan te available thaka laga adat palibole aro paper aro file khan ke dispose kora tu jold-baji te nukurikina bhal para saikina kuribole koisey. Tai para Association members khan ke bi taikhan laga leaders laga role ke komti nabhabibole koisey, kilemaney taikhan tu etu association laga bhalayi nimitey kaam korey. Aro judi leaders khan logotey eku jhamila olaisey koiley sob ke janai nidikina etu problem laga reason janaikina, settle kurikina thik kurilobole koisey. NSSA laga members khan ke mention kurikina tai para koisey ki taikhan tu government para banaikina thaka rules aro regulations laga rakhwala thaka nimitey, etu rules aro regulation ke bacchabole laga duty tu sob members laga asey.
Rural Development Department laga Additional Secretary Johnny Humtsoe, kun NSSA laga behalf te kotha koisey tai para koisey ki etu retirement tu etu Association nimitey ekta red-letter day asey. Kilemaney etu din tu 1990 batch laga achievements ke celebrate kuribole aro government para etu Association laga mojudgi ke acknowledge kora laga nutun trend suru kuridiya nimitey aro NSSA para retire hoithaka manu khan ke ekdam dangor izzat para acknowledge kurikina government ke enaka service diya laga din thakisey. Tai para koisey ki 1990 batch laga bisi members khan tu agey faley kaam kurikina nathakibo parey hoilebi taikahn pichey fale para kaam kora main takat thakisey. Aro taikhan logotey kaam kurikina tai para dikhisey ki taikhan tu self-discipline, imandar, mehnati, bahadur, hosla baraidiya aro hodai laga kaam te kitya bi pichey nahata laga manu thakisey.
President NSSA, Chubasangla Longkumer para etu 11 retire hoithaka officer ke acknowledge kora homoitey, Association members khan ke etu programme tu ekta sikha laga homoi nisna lobole koisey, taikhan laga knowledge barabole kilemaney etu retire hoithaka officer khan para taikhan laga experience,wisdom aro knowledge share kurithakisey.
Vice President, NSSA, E. Longphyo Kikon, kun para etu programme loisey tai para bi ekta closing remark disey. Aro 53rd NSS Batch para ekta special song present kurisey
1990 NSS Batch laga retire hoithaka officer khan tu Secretary, AH&VS, Y. Renbonthung Tsopoe; Joint Secretary, Soil & Water Conservation, Tsobahu Rakho; Joint Secretary Finance, Zanbeni Odyuo; Joint Secretary Finance, Neikeduolie; Joint Secretary N&RE, Kekhrieselie Mepfhu-o; Joint Secretary, Home, Margaret Kerhu-o; Joint Secretary, Home, Senlo Tep; Joint Secretary, Land Revenue, C. Danted Phom; Deputy Secretary, Environment, Forest&Climate Change, Thupusa Nienu; Deputy Secretary, H&FW, Noune-e Keri aro Secretariat Assistant, AH & VS, Chumula Sangtam.
Add Comment