New Delhi, April 08 : Eid te release hobole thaka, Akshay Kumar aro Tiger Shroff laga ‘Bade Miyan Chote Miyan’ aro Ajay Devgn laga ‘Maidaan’ film laga advance booking tu Saturday, April 06 te suru hoisey. Hisap kitap ke saisey koiley, ‘Bade Miyan Chote Miyan’ film para first din te 5900 opor ticket bikri kurisey aro sports drama ‘Maidaan’ film tu 7000 ticket bikri kurikina etu para ek kadam agey asey. Etu duita film laga bi April 10 te paid preview hobole asey aro etu film khan laga regular show tu cinema hall khan te April 11 te dikha suru hobo.
Industry tracker laga hisap te, ‘Bade Miyan Chote Miyan’ film para 5957 ticket bikri kurikina Rs 79.41 lakh poisa kamaisey, including block seat. ‘Maidaan’ film para 7034 ticket bikri kurikina Rs 59.53 lakh poisa collect kurisey. Etu majotey, Bollywood Hungama para recently report kurisey ki etu duita film laga release bi April 10 te limited hobo aro show tu 6pm picheyte hey suru hobo. Aro kun manu khan 6pm agey laga show nimitey ticket book kurisiley taikhan tu refund pabo.
Report hisap te, ‘Bade Miyan Chote Miyan’ laga makers khan para etu film ke 8 minute para kom kuridisey aro etya etu film tu 2 ghonta 35 minute laga hoijaisey. Etu ke Ali Abbas Zafar para direct kurisey aro Vashu Bhagnani laga Pooja Entertainment para produce kurisey. Etu film te Sonakshi Sinha, Manushi Chillar aro Alaya F asey.
‘Maidaan’ tu ekta sports drama asey kuntu ke Amit Sharma para produce kurisey aro etu film tu 3 hours aro 1 minute laga hoisey. Etu film te Priyamani lead role te asey. Devgn tu Syed Abdul Rahim laga role kuri asey. Tai tu ekta coach aro manager asey kun para 1952 aro 1962 majotey Indian football laga golden era ke lead kurisey jitya India para duita Asian Games gold medal jitikina, 1956 olympics laga semi final te pungchisey.
Add Comment