Headlines

Peren te CM Rio pora Festivals suru kuridese

October 29, 2018

PEREN, OCTOBER 29 : Nagaland Chief Minister, Neiphiu Rio pora Chega Gadi/Lamsimngi Mini Hornbill Cum Naga King Chilly Festival toh DC Complex New District Head Quarter, Peren te suru kuridese. Etubi October 29, 2018 te. Etu din te manu kan chama kurikena thaka ke kotha kurikena CM Rio pora Peren District toh Green District koi kena matibole kurikena naam te anediya laga ase. Kele etu district toh  sob jungle-jungle koi kena Green thaka pora (Forestry and greenery) koi kena janaise. Tai bi etu District laga manu kan ke Culture aro Tradition toh besi bhal pora ase. Etu karne etu district te thaka manu kan ke etu culture aro tradition kan toh bhal te ahkete anedebole kuribole kuribi koi kena janaise. Tai bi Zeliang dance toh ekta bhal wala ase aro ami kan state majut laga culture aro tradition performance majutte tai kan laga dance toh sobse bhal wala ase koi kena janaide thakise.

Etu Nagaland CM Rio logot eke pora Deputy Chief Minister Y. Patton, Agriculture aro Cooperation Minister G. Kaito Aye, Forest, Environement aro Climate Change, Parliamentary Affairs Minister C. M. Chang, Advisor for Law aro Justice Dr. Longrineken aro Advisor Horticulture Mhathang Yanthan kan ahe kena thakise. Aro etu oporte Senior Sorkar Officials kan bi tai kan logot eke pora ahe kena thakise koise.

Etu din Host kura, Namri Nchang, Advisor for Water Resources, porabi etu Chega Gadi/Lamsimngi nemite khushi janaise. Aro etu din laga Function toh DC Peren S. Tainiu pora ahkete luijai kena manaidese koise.

Chief Minister Rio porabi alak-alak Sorkar Department aro Self Help Group kan pora ula Exhibition cum Sale stalls din toh suru kuridese koise.

Ahkete Tradition Blessing toh Itingtiebe pora dekhaidese, Welcome Address toh President Zeme Council (N) Dr. Tumda Newme pora kuridese, aro Special gaana toh Makuilongdi Khuan Choir kan pora kuridese koise.

Etu din laga ahke din te Highlight kan toh Tradition tune toh Ilungkum pora kuridese, Cultural Extravanganza toh Zeme Cultural Society Jalukie “B”, Tenyimi Union Jalukie, Dancing Troupe kan Ahthibung, Tening, Nsong, New Jalukie aro Samziuram kan pora kuridese koise.