Friday rati Indian Air Force pilot Abhinandan Varthaman toh India deh korai ahhaise. Islamabad custody para free hoi kena Wing Commander toh India official logode Wagah border deh deya thakise.
Abhinandan para new agency PTI logode India laga mathi deh theng jepa bechide kowah toh, khor deh korai ahha toh ektum phal ase. Pakistan para kowah toh, Abhinandan logode charideya toh India aro Pakistan majode santi para thakibo nemide charideya ase. Indian Air Force para tweet deh lekhi kena thaga toh, “Abhinandan khor deh korai ahha toh kushi pai ase. Ami khan logode Wg Cdr Abhinandan ase aro tai thaga toh Indian Air Force nemide ektum proud laga ase”.
Abhinandan Varthaman nemide Prime Minister Narendra Modi para Saturday din public khan logode kowah toh, “etya Abhinandan laga meaning toh duniya deh putli hobole ase. Duniya laga manu khan toh etya jani thakibo. India para manu laga naam toh kenaga putli kori. Abhinandan laga meaning toh welcome ase hoilebi etya duniya deh Abhinandan laga meaning toh putli hobole ase”.
Khor deh korai ahha karni pura desh toh kushi manaishe aro tweet deh besi manu khan tai laga mondangor opor deh aro khor deh korai ahha nemide salute korishe.
Prime Minsiter Narendra Modi para Wing Commander logode khor deh korai ahha nemide welcome korishe aro 130 crore opor Indian khan ami khan laga sepai logode inspire ase koise. President Ram Nath KOvind para be Twitter deh pilot Abhinandan logode welcome korishe. Tai para kowah toh, tai laga mon dangor opor deh aro tai laga kaam nemide ami khan toh proud ase. Tai para ahhaibole din time deh pura Air Force khan hotai jetibo nemide wish korishe. Congress president Rahul Gandhi para kowah toh, Abhinandan laga dignity, poise aro bravery nemide desh logode proud korishe.
Tusara dangor leader khan majode Defence Minister Nirmala Sitharaman aro BJP chief Amit Shah para be welcome kora thakise.
Add Comment