LAHORE: Tuesday din te Pakistan laga komjor sarir thaka purana prime minister Nawaz Sharif toh Lahore te wapas jail te jabole ase. Aro tai toh bachi kena thaka saath saal jail toh khotom kuribole ghurai ase. Purana prime minister Nawaz Sharif toh Al-Azizia Mills corruption case nimite jail laga sazaa pai kena ase.
Nawaz Sharif te top court para cchoi hafta nimite jail dee kena thakishe. Top court para tai ke medical treatment jabo dibole March 26 para bail dishe. Aro April 27 te permanent bail laga petition toh Nawaz para file kurishe. Nawaz Sharif toh acute anxiety aro depression para dhuk lok pai thakishe.
Bail toh May 7 te khotom, hubole ase. Hoile bhi court para Nawaz laga UK te treatment nimite jabole laga review petition toh mana kuri dishe.
Monday ddin PML-N spokesperson Marriyum Aurangzeb koishe Nawaz Sharif toh Tuesday te Kot Lakhpat Jail, Lahore te ghurai ahi ase.
Tai para koishe ke PML-N kaam kura khan toh Prime Minister Imran Khan laga anti-people policies khilaf te rasta te olabole ekdam rukhi ase. Tai khan toh leaderships mata hee rukhi ase. Tai para aro koishe ke Sharif toh procession te jail te jabole mon nai. Hoile bhi kaam kura manu khan toh tai ke etu kuribole ekdam koi ase.
Nawaz Sharif toh teen bar prime minister hoishe. December 24, 2018 para saath saal jail laga sazaa pai kena ase. Court para tai khilaf te teenta corruption cases file kurishe. Etu toh Panama papers case te apex court para July 28, 2017 te Sharif khilaf te adesh dishe.
Nawaz Sharif ke Adiyala Jail te dishe aro tai laga request para Kot Lakhpat Jail te pothaishe.
Add Comment