Pushpa 2 : Allu Arjun para Acting fees 30% para baraidisey

Hyderabad, April 26 : Allu Arjun laga nutun film Pushpa 2: The Rule nimitey josh tu ekta alag level te chuli asey. Social media te etu movie nimitey dangor 275 crore laga deal kurisey koikina rumour chuli asey. Etu film laga popularity bari thaka para Arjun laga compensation(salary) ke bi influence kuri thaka nisna asey. Reports hisap te tai para  tailaga acting fees tu 30% para bisi uthaidisey. Ekta report para dawa kurisey, aji kali Allu Arjun tu industry te sobsey mashoor actor asey. Aro almost sob film bana manu khan para tailogotey kaam kuribole laga iccha jataisey. Etu kile asey koiley, taikhan tu Pushpa film nimitey manu khan kiman josh te asey etu dikhi asey. Aro etu nimitey Allu Arjun para Pushpa 2 film para pabole thaka salary  ke baraidisey. Etu project tu Independence Day weekend te release hobole asey. Industry reports hisap te, etu film nimitey Allu Arjun laga fee tu 100 crore maan asey. Tai para tailaga next project nimitey Rs 150 crore poisa lobo parey koikina expect kuri asey. South fale, ekta actor ke eman salary diya tu aam kotha hoijaisey. Tatey faley film nimitey budget bhak kora te ekta actor laga fee tu sobsey dangor aro jaruri hisa asey. Reports para dikhai asey ki Pushpa 2 : The Rule film, kuntu laga budget Rs 500 crore asey, North India te etu film tu theatre te dikhabole laga rights nimitey bisi dangor deal secure kurisey, Rs 200 crore maan. Etu opor te, etu film nimitey digital rights tu Rs 250 crore para bikri hoisey.