Qatar te Taliban aro Afghanistan peace kotha koribo

Kabul: September 6. 2020. Taliban’s negotiating team khan Qatar pongchise koikena Saturday din spokesman para koishe. Eman din para peace talks deri hoikena thaka toh Afghan government logot kotha soruh koriboli ase koishe. Doha te kotha koriboli aro darik toh aro fesla howah nai hoilebi, tuita side para be signal hesab te kotha toh jolti kuribo, aro etu samay jai te thaka manuh khan botli hoboli kotha be kuribo. “ami khan laga kotha koboli team toh Doha pongchise. Chotu ekta techinal kam toh kotom hoile kotha kora soruh hobo” koikena Taliban spokesman Suhail Shaheen para AFP logot janai thishe. Olop din agae te Taliban team khan toh Pakistan te thakishe aro etu samay tai khan Islamabad te government logot peace nemirte kotha kori thakishe. Qatar authorities khan para kuan manuh khan desh te ahibo, tai khan ke 7 din nemite quarantine te rakiase, hoilebi konuba nemite kuan khan hotai testing loiase etu manuh khan nemite te maaf ase koishe. Afghan laga kotha kora team toh Saturday din Kabul pongchise, hoilebi logistics team khan toh etu hafta agea te Doha pongchi kena ase koishe. Afghan government’s reconciliation council laga spokesman, Faraidoon Khawzoon para koishe ke, kotha kora team khan toh kotha koriboli ready te ase koishe. “jail te thaka manuh khan ke jarai kotom hoishe, etu nemite kotha koboli deri hoboli eku excuse nai” tai para koishe. “hoilebi, Taliban khan toh kotha koriboli ready te nai. Ami khan bhapana te Taliban toh ready hoikena kotha kora soruh hoboli lage”. Peace kotha toh, February moina te United States aro Taliban pithor te deal kora hesab te March moina para soruh hoboli thaka ase, etu samay Kabul te olai thishe. Hoilebi, larai hoikena aro jail te thaka manuh nemite kotha koriboli thaka toh bechete loikna jaishe koishe.