Mumbai, 9 July : Bollywood actor R Madhavan koise ke tai aru tai laga wife hamesha tai laga lora Vedaant ke normal aru grounded upbringing dibole try kori ase. Hindustan Times logot kotha pati thaka time te Madhavan koise ke fame aru success thakilebi, tai nijor family te discipline beshi importance diye.
Tai koise ke Vedaant jodi family business ba kunba kaam sambhalibole mon ase, itu hoile age nijor effort pora kaam sikhibo lage. Tai etu example dise ke cook hobo mon thakile age ek saal cook hisab te kaam koribo lage. Etiya pora tai business ba leadership role loi bhabibo paribo. Tai laga hisab te, etu process manu ke hardworking, humble aru responsible bonai.
Madhavan koise ke parents hisab te bacha ke sob jinis ready kori dile, tai nijor life laga value bujhibo napare. Tai karone Vedaant ke nijor kaam nijore koribole encourage kora hoi ase.
Vedaant swimming te India ke represent kori bishi medal jiti ase. Tai sports career te bhal perform kori thakilebi, Madhavan koise ke achievement pora beshi important hoise bhal character build kora.
Tai koise ke successful hobo bhal kotha, kintu manu hisab te grounded, respectful aru honest thaka he sob pora dangor achievement ase. Tai laga parenting approach social media te bishi manu laga attention pai ase aru anek manu tai laga bhabona ke appreciate kori ase.
