New Delhi, April 21 : Actor Aayush Sharma, kun Salman Khan laga bhuini Arpita Khan ke shaddi kurisey, tai tu nutun film ‘Ruslaan’ te dikhibole asey. April 21 te, Salman Khan para etu film release hobole ageyte shoutout disey. Aro tailaga fans aro followers khan ke theatre te etu film sabole encourage kurisey.
Sunday din te, Salman para tailaga social media handle te etu film laga ekta jhalak share kurikina likhisey, “April 26 te Ruslaan release hoboel asey. Etu ke jaikina theatre te sabi.”
Etu majotey, Bollywood Hungama logotey ekta interview kora te, Aayush ke tai para Salman Khan Films kiley charisey koikina huda homoitey. Tai para koisey, “Enaka nohoi, etu amilaga ghor asey. Kun actor bi khali ekta production house logotey kaam nokorey. Hosa koisey koiley, etu tu hasibole laga kotha asey, hoilebi amilaga choice ke loikina bisi kotha chuli thaksey. Enaka bisi actor asey, kun khan taikhan laga comfort zone te kaam kurisey. Taikhan ekta production house logotey kaam kurisey aro picheyte tatey para olaijaisey, ao etu picheyte ekey production house te wapas ahisey. Ami bahar kadam rakhibole mon thakisey, ami laga irada tu tatey bahar jabole laga thakisey.”
Ruslaan film ke Karan Lalit Butani para direct kurisey aro etu te Aayush main role te asey. Etu film te Sushrii Shreya Mishraa, Jagapathi Babu aro Vidya Malvade bi dangor role te asey. Etu film tu theatre te April 26 te release hobole asey.
Add Comment