Shah Rukh Khan laga Mannat tu first Salman Khan ke offer kurisiley

New Delhi, May 10: Bollywood laga duijun sobsey bisi morom thaka superstar Shah Rukh Khan aro Salman Khan para Bollywood town te bisi shohrat kamaisey. Tai khan dui jun bi Mumbai laga ekey Bandra area te bohey. Hoilebi bisi manu khan para etu najani kina thakibo ki Salman Khan tu aji Shah Rukh Khan laga danger mashoor bungalow te buhi bole thakisey. Salman Khan para ekbar etu janaisey ki Shah Rukh Khan thaka ghor ‘Mannat’ tu sobsey first taikey offer kurishi ley. Hoilebi tai laga baba Salim Khan para taikey etu nikinibole koisey. Bollywood Hungama logotey kora ekta purana interview te, Salman khan ke Shah Rukh Khan logotey ki enaka ekta bustu asey kuntu tai logotey thakibole wish korey koikina huda homoitey, Salman Khan para jawab dikina koisey, “Tailaga bungalow (Mannat). Hoilebi etu tu ami thik career suru kora homoitey ami logotey first ahisiley.” Etu ghor nikina laga karon ke agey elaborate kurikina Salman para koisey, “Amilaga baba (film producer aro scriptwriter Salim Khan) para koisey eman dangor ghor te apni ki kuribo? Ami Shah Rukh Khan ke hudibole mon asey apni eman dangor ghor te ki korey?” Shah Rukh Khan laga bungalow, Mannat tu Bolllywood te ekta tourist hotspot asey koikina jana jai. Hodai din, bisi manu khan etu alishan property laga bahar te Shah Rukh Khan laga ekta jhalak dikhibole nimitey jama hoi. Mumbai laga Bandra te thaka Shah Rukh Khan laga etu ghor tu bisi manu khan para poson kora jaga asey.