Gangtok, October 18 : State Cabinet para Relief Camp te boha utu victim khan ke ghor bhara laga modod dibole faisla kurisey kun khan Relief Camp te buhi asey. Etu modod tu 3 moina karney dibole asey aro etu modod para Sikkim laga manu khan ke taikhan laga bhara ghor te wapas jaikina thakibole modod kuribo.
Etu faisla tu, cabinet para Sikkim te akha nukurikina thaka ghotna huwa nimitey nijor laga ghor para dur hoija manu khan ke modod dibole nimitey luwa laga asey.
October 17, 2023 te, Gangtok laga Cabinet Hall of Tashiling Secretariat te State Cabinet laga ekta meeting rakhisey.
Etu meeting te, 205 Agenda items discuss kurisey aro bisi jaruri faisla khan loisey.
Cabinet para 4 October 2023 te, Teesta nudi te achanak para dangor flood aha picheyte barbadi aha laga mamla te bi ekta resolution loisey kuntu te bisi manu khan laga jaan jaisey aro nudi kina rte boha manu khan laga kamayi kora laga jariya aro property barbad kuridisey. Etu dangor barbadi aha te bisi manu khan laga jaan ja nimitey pura Sikkim society tu monduk hoikina asey. Council of Ministers para manu khan, India laga sarkar, alag rajya laga sarkar aro Organization khan ke enaka dorkar laga homoi te bisi modod diya nimitey dhanyabad janaisey.
State cabinet para etu resolution apnaisey :
“Council of Ministers para mon bhari kurikina 4th October 2023 te achanak para dangor flood aha te manu laga jibon, kamayi kora laga jariya, property aro kunba jaruri building nohoile jaga khan barbad huwa laga jikar kurisey. Enaka dukh laga homoitey, State Government para Sikkim laga manu khan logotey khara kuri asey aro etu situation para dukh paikina thaka manu khan ke taikhan laga zindigi aro kamayi kurikina kha laga jariya ke wapas banabole dibole nimitey sob tarika laga modod aro support dibole committed asey. Council of Ministers khan para etu ghotna te murija manu khan laga monduk hoikina thaka parivar khan ke taikhan laga dukh janaisey. Aro koisey Amikhan para Sikkimese samaj para enaka dukh laga homoitey ekjut hoikina dikhaidiya tu janabole mon asey aro rajya laga administration ke etu dangor musibat ke dur kuribole modod kuribole nimitey din raat kaam kora sob manu aro organization laga contribution ke acknowledge kuribole mon asey. Etu sob Hero khan laga modod tu ekta eeta nisna asey kuntu para amikhan amikhan laga rajya ke wapas banabo aro etu dangor musibat para ekeylogotey aro tagra hoikina bahar olabo.
Amikhan para Sikkim laga manu khan ke enaka homoitey te strong hoikina thakibole aro positive bhabna kurikina thakibole request kuri asey.”
Etu resolution adopt kora picheyte etu situation te murija manu khan ke somman dibole nimitey 2 minute laga silence rakhisey.
Cabinet para etu situation te manu khan para taikhan laga property, kamayi kora laga jariya khan haraidiya para dukh paikina thaka tu kom kuribole nimitey cabinet para kunba kadam uthabole faisla loisey. Sarkar para etu manu khan ke thakibole nimitey bhal jaga provide kuribole asey.
Aro etu maksat para Cabinet para duita Housing (Ghor diya) laga scheme introduce kurisey :
- Sikkim Punarvaas Awaas Yojana
- Sikkin Janta Housing Colony
Sikkim Punarvaas Awaas Yojana laga under te 2,100 ghor banabole asey aro etu scheme te utu manu khan nimitey ekta suraksit jag ate ghor banaidibole asey kun khan laga ghor tu flood para barbad kuridisey. Sarkar para etu ghor khan tu Government laga mati nohoile kunba para donate kora mati te banabole asey.
Sikkim Janata Housing Colony laga under te 2000 ghor banabole asey kotey flood para barbad hoija ghor laga malik khan ke thakibole dibole nimitey ekta suraksit jaga te bhara ghor banaidibole asey. Etu ghor malik khan ke etu scheme laga under te bhara laga hisap te ghor bhak kuribole asey. Hoilebi sarkar para first 3 saal nimitey eku bhara nolobo. Aro 3 saal complete huwa picheyte manu khan para bhara hisap te poisa dikina thakibo lagibo.
Add Comment