Sikkim te 10 din lockdown junaishe

May 5, 2021. Sikkim te COVID-19 bemari halat toh hotai din beya wala hoikena jai ase. Tuesday din Sikkim te 230 notun COVID-19 cases thurishe. Sikkim te notun 230 COVID-19 cases thura te 186 cases toh State’s East district para thakishe. Sikkim laga dosura districts te notun COVID-19 cases toh West – 17, South – 19 aro North – 8, thurishe koishe. Sikkim te itya etu notun 230 cases thura nemite bapana kora toh positivity rate toh 28.78 percent te othishe. Sikkim te 799 samples tests lowa toh etu notun 230 cases toh thura ase. Etu notun 230 cases melaikena Sikkim te COVID-19 cases toh 8698 hoishe. Etu samai Sikkim te active cases toh 1930 hoikena ase. Dosura khobor ekta te Sikkim te Covid-19 bemari para aro 1 jun mora khobor paishe. Etu melaikena Sikkim te COVID-19 bemari para manuh mora toh sob melaikena 151 hoishe. Etu samai, Sikkim Government para COVID-19 bemari phila rokabo nemite 10-din lockdown thakiboli junai thishe. Etu lockdown toh May 6 (Thursday) din para loikena soruh hobo. Inter-State aro inter-district te gari peraboli be bondh koribo. Sikkim Home Department para koishe ke, “State te COVID-19 cases laga average test positivity toh 10 din majot te 20% oper othishe” koikena khobor toh janaishe.