Sikkim te May 16 para 18-44 umer vaccination soruh

May 12, 2021. Sikkim te May 16 darik para 18 umer para loikena 44 umer manuh ke COVID-19 vaccination soruh koribo koikena janaishe. Tuesday din te Sikkim Chief Minister PS Tamang aro Autonomous District Councils (ADCs) aro Block Development Officers (BDOs) meeting thaka samai fesla toh junaishe. Sikkim Chief Minister para etu umer manuh khan logot jodi te nam register koriboli janaishe. Tai para aro koishe, “kaun manuh ghor te isolation te bohi ase etu manuh khan nemite tawai toh ghor dak pongchai dibo”. Sikkim Chief Minister para aro koishe, “Rations toh BPL individuals logot via block Administrative Centres (BACs) para thibo,” koishe. Sikkim te COVID-19 cases besi othi-thaka te aro manuh mora nemite, state government para halat toh control te aniboli kam kori ase koishe. Pakyong Airport te kaun passengers ahibo, tai khan logot negative RT-PCR test report toh thakiboli compulsory ase koishe. “Pakyong Airport te passengers hath te 48 gonda pithor laga negative RTPCR test report thakiboli laki” koikena Government of Sikkim laga Principal Secretary (Home), R Telang para junaishe. Etu oper Tuesday din Sikkim te COVID-19 bemar para 8 jun morishe, etu melaikena state te 177 manuh bemari para morikena ase koishe. Tuesday din Sikkim te aro 241 notun COVID-19 cases thurishe. Etu notun 241 cases pithor te 189 cases toh East district para thurishe, west district te 12 cases paishe, South district te 35 thurishe aro North district te 5 cases khobor paishe koishe.