AIZAWL, February 11: Election laga aage te pura state te daru bikiri koriya bondh koribo laga wada koriya nisina, ekta notun bill toh March laga tweita wala habta te shuru koriya Mizoram Assembly session te dibole ase, ekjun Minister pora Monday te koise.
“Mizoram te daru bikiri koriya pura bondh koribo nimite moi khan pora ekta notun kanun bonaibo. Etu mamla laga Bill toh ahiya Assembly session te dibo,” Mizoram Excise and Narcotics Minister K. Beichhua pora IANS ke koise.
Assembly laga ahiya session toh dos saal bicche te Chief Minister Zoramthanga pora loikena Mizo National Front (MNF) pora office julai kena shuru koriya sobse pohoila budget session ase aro sobse pohoila full-fledged session ase.
Tai pora koise ki ahiya Bill toh etiya thakiya Mizoram Liquor (Prohibition and Control) Act, 2014 ke podli koribo.
“Etu toh election laga aage te moi khan pora manu khan ke wada koriya ase. Moi khan laga officials khan etiya daru bikiri koriya bondh koriya bicche te kiman revenue gomti hobo, etu kindi kori ase. Moi khan etu revenue gomti howa te aalag sectors pora kenika othaibo etu laga aalag rasta bisari ase aro phabana kori ase.”
Etu Minister pora koise ki MNF government laga sobse dangor maksat toh daru bikiri koriya ke pura bondh koribole ase aro dawai(drugs) aro daru laga diktari mittaibo karne konoba kadam lobole ase.
Beichhua pora koise: “Government pora etu bondh koriya laga aage kam nisina aro Christmas aro New Year te daru nakhabi nimite, December 18 te December 21 pora January 14 tak dry days manibole aadesh dise aro etu bondh koriya toh olop thakikena March 10 tak lamba korise.”
Hoilebi Gauhati High Court laga Aizawl bench pora daru dukan malik khan aro warehouse malik khan pora petition filed koriya nimite te etu aadesh hatai dise.
“Dawai aro daru pora besi jowan manu khan ke morai dise aro besi jowan maa laga moda khan bi dawai aro daru pora morise,” Beichhua pora kosie.
Etu Mizoram Liquor (Prohibition and Control) Act, 2014, toh pohoila laga Congress government pora January 2015 te 18-saal purana total prohibition Act wapas anise.
Mizoram laga daru dukan malik khan pora koise ki government pora daru bikiri koriya ke bondh koriya nimite, tai khan ek din te Rs 4 lakh loss khaise aro daru laga stock toh besi hoi thakise kile koile etiya laga fiscal saal (2018-19) khotom nahowa tak daru toh kheniya pora.
1,091,014 ( 2011 census hisabte) laga population pora, Mizoram toh India te Christian majority (87 per cent) state teenta majote ekta ase.
Add Comment