Delhi, 30 June : Taylor Swift aru Travis Kelce laga rumored wedding uporte speculation etiya aro bishi barhi jai ase. Notun reports hisab te, couple tu wedding ceremony secret rakhibole khub strict measures loi ase. Guests khan ke non-disclosure agreements (NDAs) sign koribole kowa pora loi digital invitations pathai leaks kom koribole try kora tak, Swift aru Kelce tai khan laga dangor din ke pura private rakhibole sob try kori ase.
NBC News laga report hisab te, Swift aru Kelce laga wedding festivities te 1,000 pora bishi guests ahibo kuina expect kori ase.
Matter laga khobor thaka ekta source, juntu invitees majote ekta ase, para koise ki Friday din laga festivities te lagbhag 1,100 manu attend koribo.
Holiday weekend somoi Manhattan laga kunba roads te closure permits diya aru venue laga schedule block kori rakha pora speculation aro barhi jai ase ki Swift aru Kelce laga wedding etu weekend te hobo pare kuina. Fans khan mon kori ase ki etu developments khan wedding khub usor te thaka indication ase.
Source para aro koise ki invitations pai thaka guests khan ke electronic invites logot NDAs bhi pathaise. Kintu NDAs laga details etiya tak ulai aha nai.
Bishi artists para performances bhi thakibo kuina source para janai dise.
The New York Times para report kori thakise ki Swift laga team members khan ke Pennsylvania laga Lancaster County te thaka Rock Lititz production campus te dekha jai ase. Etu jagah te dangor concerts karone sets aru stages bona jai.
Kunba din agey, NBC News para report kori thakise ki ekta source koise venue tu July 2 pora July 4 weekend karone ekta dangor event prepare kori ase.
Reports hisab te, Taylor Swift aru Travis Kelce July 3 din Madison Square Garden te shaadi kuribo. Event te lagbhag 1,100 pora 1,200 guests attend koribo kuina expect kori ase. Venue tu Taylor karone khub special ase, karon tai nijor career te bishi bar etu stage te perform kori ase.
Security aru privacy etu high-profile event laga sob pora dangor priorities ase. Paparazzi exposure pura avoid koribole organizers khan tinted transport buses, secure underground parking aru tightly controlled entry points nisina strict arrangements kori ase.
Star-studded guest list te couple laga close friends khan bhi ase. Attend koribo kuina expect kora manu khan majote Zoë Kravitz, Ed Sheeran, Cherry Seaborn, Suki Waterhouse, Benson Boone aru Haim family laga members bhi ase.
