BENGALURU, NOVEMBER 12 : Ananth Kumar, ekta bhal aro alak BJP Leader, Purana Prime Minister Atal Bihari Vajpayee aro aji-kali laga Prime Minister Narendra Modi laga sorkar bitor te bi Minister nemite thaka toh Monday pujut phale kobi 2:00 am paji te murise. Etubi Hospital te lung cancer bemar pora. Aro tai mura toh 59 sal huikena murise koise.
Etu Ananth Kumar toh Senior BJP leader aro Union Minister nemite thaka laga ase. Aro tai lung bemar huikena US, New York te sabole jai kena thaka laga ase. Eneka huikena tai Bengaluru te wabas ahese. Aro etu Bengaluru laga Hospital te tai Monday pujut phale murijaa huise koise.
Tai mura time te tai laga maiki Tejaswini aro tai 2 jun laga 2 jun maiki bacha bi eke pora thakise. Tai laga mura kao edia toh tai thaka jaka Basavanagudi te ase. Aro tai mura laga kao toh Jagannath Bhavan, BJP’s State Office, Malleshwaram te thaka te Tuesday din te luijabole ase. Eneka huikena National College Grounds, Bengaluru laga te luijabole ase. Etu bejete tai logot last hisab dekhaidiya manabole ase show last respect). Aro tai laga mura kao toh Tuesday din 1:00 pm paji phale thalidebole ase koi kena, State BJP General Secretary N Ravi Kumar pora khobor te janaise.
Tai mura nemite bi National Flag toh ami kan sob desh te lakabole ase. Kele etu Union Minister ke ekta dangor hisabte dekhaidiya hisabte. Aro Karnataka State kan toh tai kan state sob te 3 din nemite mura din manabole (state mourning). Aro Monday din te toh tai kan state laga sob Schools, Colleges aro Officers kan toh baan kuride kena thakise koise.
Etu Ananth Kumar toh Arts aro Law buri kena Graduate hua laga ase. Aro BJP Party nemite 1987 te nahuijaa ahkete Akhila Bharatiya Vidyarthi Parishad (ABVP), Student Organisation kan Rashtriya Swayamsevak Sangh (RSS) laga ke melekena aro hisha kurikena thaka laga ase. Tai bi Karnataka State pora MP nemite 6 bar hua laga ase. Aro United Nations te kotha kura time te Kannada kotha pora kotha kura toh tai hi ahke wala thakise koise.
Tai mura nemite Prime Minister Narendra Modi; Karnataka Chief Minister HD Kumaraswamy; Union Minister DV Sadananda Gowda; Defence Minister Nirmala Sitharaman; Opposition leaders kan kobi Rahul Gandhi, Mamata Banerjee aro Arvind Kejriwal; Nagaland Governor Shri PB Acharya aro Nagaland Chief Minister Neiphiu Rio aro tusera kan sob pora mondukh kotha kan janaide thakise koise.
Add Comment