Nagaland

Tizit te coordination meeting hoishey

January 17, 2025

Ahibole thaka Republic Day celebration nimitey, sob head of offices, ward chairman, Gaon Bura, public leader aro NGO khan laga ekta coordination meeting rakhisey, 16th Jnauary te. Etu meeting tu Tizit, Mon te ADC laga conference Hall te kurisiley.

Etu meeting ke SDO (Civil), Tizit, Tumben P Tsanglao para cholaisey. Etu meeting te, Republic Day laga successful aro dangor celebration nimitey alag alag department aro institution khan ke kaam bhak kurisey.

ADC DIMAPUR PARA REPUBLIC DAY CELEBRATIONS NIMITEY PREPARATORY MEETING RAKHISEY

Additional Deputy Commissioner, Dimapur, Zakabo V. Rotoka para 16 January 2025 te ahibole thaka Republic Day nimitey tayari kurithaka tu finalize kuribole nimitey 16th Jnauary 2025 te ekta meeting rakhisiley. Etu meeting tu DC Conference hall, Dimapur te kurisey. Etu meeting te alag alag government department laga heads, public institution laga representative khan aro dusra khan participate kurisey. 

Etu meeting chulithaka homoitey, Republic Day program laga arrangement nimitey lamba discussion rakhisey. Kuntu te seating arrangements, security, cultural performance khan laga bari te discuss kurisey. ADC para alag alag department para milikina kaam kuribole laga importance janaisey taki etu event tu eku problem nohoikina smooth para manabole paribo.

Etu celebration nimitey main venue, decoration, sound system aro stage arrangement kuribole laga zimidari khan bi department majotey bhak kurisey. ADC para etu event nimitey welcome gate banaithaka aro cultural performance aro parade khan laga rehearsal tu kiman agey barisey etu check kurisey. 

Law enforcement agency khan ke special instruction disey, Republic Day manaithaka homoitey kara security measures rakhibole. Ageybarikina etu event laga din te eku musibat ahisey koiley etu ke address kuribole nimitey plan khan discuss kurisey. 

ADC para biswas jataisey ki sob manu laga mehnat para, Dimapur te Republic Day laga celebration tu ekta dangor success hobo.

Etu meeting tu sob participant khan etu event ke Dimapur laga manu khan nimitey yaadgar banabole nimitey taikhan laga role nibhabole commitment kurikina khotom hoisey.