Tripura Education Minister Para Lucky-Srivastava Football Tournament Suru Kurishe

Agencies: Sunday te Tripura education minister Ratan Lal Nath para 22^nd ONGC Lucky-Srivastava Football Tournament toh kick off kuri dishe. Etu toh ONGC Tripura Asset manager G.K. Singha Roy laga presence te hoishe. Etu kick off program toh Agartala laga Umakanta Stadium te hoishe.

Tournament toh formally kick off kura pichete education minister Nath koishe Lucky-Srivastava toh Tripura te sob para popular football tournaments ase.

Agi-kali he ONGC para prize poisa toh uthai dishe. Aro tai khan expect kuri ase ke samnay states khan para bhal teams khan etu tournament te hissa lubole ahibole.

ONGC laga naam ucha kuri kena especially Tripura Asset laga ED-Asset manager G.K. Singha Roy, Nath koishe state te ONGC toh para sports toh ekdam bhal para uthabole ekdam bhal kadam loi ase.

Occasion te kotha kuri kena Asset manager G.K. Singha Roy koishe tournament toh ONGC para kadam utha nimite ami khan kuribole pari ase. Etu toh Tripura state te football toh uthabole nimite ase. Aro state laga football players khan majote exposure dibole paribole nimite ase.

ONGC Tripura Asset para organize kura knock out tournament laga finals toh Sunday te Agartala laga Umakanta School ground te hubole ase.

Sabole aha manu khan toh Tripura laga Young Darlong Association (YDA) aro DFA Southern Samiti, Kolkata majhote huwa laarai toh dekhibole parishe. Etu match toh defending champions YDA laga favor te hoishe. YDa toh tai khan laga opponent khilaf te 6-2 para jeetishe.

Elton Darlong toh man of the match hoishe.

Tournament toh All India Football Federation logote affiliate hoi kena ase. Etu tounamen te barota (12) teams khan participate kuribole ase. Etu barota (12) teams toh Tripura, Assam, Manipur, Mizoram, aro Kolkata para ase.

Final match toh February 24 din te hubole ase.

Participate kura barota (12) teams khan majote choita teams toh Tripura para ase, duita toh Manipur para ase aro Mizoram, Meghalaya, Assam aro West Bengal para one each team ase.

Champion team ke prize poisa toh uthai kena etiya Rs. 5 lakh dibole ase. Aro runners-up toh Rs. 2 Lakh pabo.

Jua saal toh Champion team ke pirize poisa toh Rs. 2 lakh thakishe aro 1 lakh toh runners up khan nimite thakishe.

Etu khan majote semi-finals te qualify kura teamskhan ke Rs. 40, 000 dibo aro Quarter-finals te pungcha khan ke toh Rs. 20,000 dibole ase.

Final laga Man of the Match ke Rs. 10,000 dibole ase aro Semi-finals tok laga Man of the Match ke Rs. 5,000 dibole ase.

Tournament toh duita ONGCians Justin Lucky aro SK Srivastava laga yaad para kuri ase. Tai duijon toh 1992 te militants khan laga guli lagi kena muri jaishe.