Tripura te sobse besi 13 morishe aro 783 notun cases

May 29, 2021. Friday din Tripura te 1 din pithor te Covid19 bemar para sobse besi 13 manuh morishe, etu melaikena state te 495 morikena ase koishe. 24 gonda pithor Tripura te notun Covid-19 cases toh 783 thurishe. Itya state te COVID19 casesload toh 49,290 ase, koikena Friday din state health bulletin para janaishe. Tripura te 6,324 active cases ase aro etu oper te bemar para manuh morikena thaka toh 495 hoishe. Jowa 24 gonda pithor te, 878 manuh discharged hoishe, etu nemite sob melaikena 42,408 Covid-19 bemar para bhal hoikena ase. Etu samai, State laga total population te 17% ke Covid-19 vaccine 1^st dose thikena ase. 24 gonda pithor te State te COVID19 tally toh 49,000 mark oper jaikena ase. Media bulletin khobor hesab te May 28 darik dak te 9,10,318 samples tested loikena ase aro Friday din te 49,290 samples tested korishe. 24 gonda pithor te sob melaikena 11,237 test loikena thaka te 1596 toh RT-PCR test ase aro 9,641 toh Rapid Antigen Tests ase, etu pithor te 783 logot virus positive test thurishe. Hotai din laga bemar bhal howa khobor toh olop othishe. Etu samai aro 24 gonda pithor te 878 manuh Covid19 bemar bhal hoikena jarishe. Itya Tripura te Covid-19 bemar rate toh 6.97% te othikena ase aro bemar bhal howa rate toh 86.14% te ase. Manuh mora rate toh 1.01% te ase. West District toh bemari besi thaka list te sobse oper te ase, koikena health department laga media bulletin para khobor toh janaishe. 24 gonda pithor West District te 378 Covid19 cases thurishe, etu jaga toh- South te 110 cases, Gomati te 62 cases, Dhalai te 44 cases, Sepahijala te 38 cases, North Tripura te 50 cases, Unakoti te 73 cases aro Khowai district te 28 cases thurishe koishe.