Trump para US te Chinese apps TikTok aro WeChat ban kuriboli order thishe

August 7, 2020. Thursday din United States laga President Donald Trump para tuita(2) Chinese companies ByteDance aro Tencent logot transactions ban kuriboli order thishe aro etu 45 din pithor te kuriboli koishe. ByteDance tuh popular sharing app TikTok laga malik ase aro popular messaging aro mobile payment app WeChat laga malik tuh Tencent ase. Khobor hesab te, Trump laga administration para koishe ke, US digital networks oper te Chinese apps tuh “besas” kuriboli nai. “TikTok app tuh disinformation campaigns nemite te joikena Chinese Communist Party khan etu para laab hoi, etu karne United States para tangor kam kurikena TikTok ke kelaaf  oper te national security tuh pachaboli lage,”  koikena  Trump para order te koishe. Aro dosura site, Trump aro koishe ke, WeChat para users khan laga hath para automatically khobor tuh loikena Chinese Communist Party para  American laga  personal aro proprietary information tuh joboli parey koishe. Etu samay Thursday din te Trump para koishe ke, United States para China logot besas komti hoishe aro dosura desh khan para be pharmaceuticals aro medical supplies bondh kuriboli koishe. Trump aro koishe ke, China para American manuh ke jokom kura aro Duniyaa ke coronavirus bemari spread kura nemite derabo lage. “China para besi kam beya kurishe, United States logot ekla nahoikena Duniyaa logot be ase. Besi beya kam kuirshe”. Trump para aro koishe. “ahiboli char(4) saal te, ami khan nejor pharmaceutical aro medical supply chains tuh ghor te anibo aro China logot melekena thaka tuh kotom kuribo,” koikena Trump para koishe.