Union Home Minister Rajnath Singh pora Hornbill Festival suru korise

Kohima, 1 December: Saturday din Kisama bosti deh Nagaland laga 19^th Hornbill festival toh Union Home Minister Rajnath Singh pora suru korise. Tai etu din deh Hornbill Festival  toh ekta India desh laga culture aro tradition nesana laga he ase koise. Tai pora be aro India desh deh etu nesana alag-alag din alag-alag jaga pora manai koikena janaise. Tai toh State government ektum kushi powah kotha janaideya thakise. Kelay koile tusra part laga state debe Festival dangor korikena thaga karni. Tai pora be aro kowah toh, festival pora nejor state laga tribes ekala nahoi kena tusara neighbouring aro state khan logodebe mela meli kori. Tai pora be kowah toh, North Eastern Council (NEC) pora Patkai Christian College, Dimapur deh Margaret Shishak School of Music bonabo karni fund dese. Tai kushi pai kena kotha janaideya toh, NEC pora Delhi deh North Eastern Cultural and Information Centre bonai ase. Etu pora Eight North east state laga rich history, culture, heritage aro cuisine dekhabole ase. Rajnath pora kowah toh, state logode first medical college toh pabole ase. Etu nemide Ministry of Health aro Family Welfare pora Rs. 300 Crores sanction korikena ase. Aro NEC pora be Dimapur deh ₹4981.31 lakhs daam laga North East Regional Multi Disciplinary Paramedical Institute bonabo karni fund dekena ase. Tai kowah toh, Government of India toh South-East Asia logode mela-meli thakibo karni bhabuna kori ase. Nagaland laga geographically toh vantage point deh ase. Etu pora South—East Asia laga gateway hobole paribo. Tai laga bhabuna hesab deh North-East toh businesses nemide tourist phal hoijabole biswas kori ase. Kotha kora time deh, Nagaland toh lamba din dukh powah thakise, tai desh aro State laga economy growth joldi othabo karni lamba stride lobole janaise. Aro India toh ekta world power hobo karni motob debole janaise. Speech time deh Nagaland Governor, P.B.Acharya pora Nagas khan logode kushi pabole aro thank janaidebole right ase koise. Kelay koile India deh Hornbill festival be ekta sob manu pora jana cultural festivals bonabole para karni. Ami khan phal pora jani thaga toh, Government of India pora Hornbill festival toh ekta major performing artist’s events recognized korise India deh. Etu festival laga naam ocha howah toh Nagaland laga sob tribes melikena hesha lowah pora ase koikena tai pora janaise. Aro tai sob hesha deh thaga artists logode congratulate korise. Governor pora aro-janaideya toh, “Nagaland toh economically gara hobole paribo- khaa-lowah thek pora thaga aro state pora natural resournce olai kena. Ami kkhan laga educated jouth khan toh laab-powah laga hobo lagi. Tai khan laga bhabuna putli korikena, ami khan laga bosti deh phal pora saikena aro ami khan lagi thaga deh kotha korikena hee Nagaland toh phal state hobole paribo.” Chief Minister of Nagaland, Neiphiu Rio pora tai laga speech time deh kowah toh, jaija 19 sal time pora Hornbill Fest toh India kela nahoi kena pura duniya deh ekta sobse kaam laga tourism events hoise. Tai pora be kowah toh, tourism pora state’s economy deh motob debole chance ase. Tai pora be opening ceremony deh ahha Union Minister Rajnath Singh, US Ambassador Kenneth Juster logode thanks janaideya thakise. Inaugural function time deh, General Secretary NBCC, Rev. Dr. Zelhou Keyho pora invocation (prathna) kora thakise, Village chief, Shikuto Zalipu aro Rattle & Hum Music society pora traditional blessings kora thakise.