AGARTALA/AIZAWL/KOHIMA, AUGUST 31 : Tripura state laga Tribal Parties leaders kan Centre ke National Register of Citizens (NRC) toh tai kan state te bi manabole kuribi koi kena kotha janaise. Etu bejete Mizoram aro Nagaland state laga alak-alak Parties kan bi tai kan neju state te etu NRC manabole kuribi koi kena kotha ulaise koise.
Indigenous Nationalist Party of Tripura (INPT) aro Indigenous People’s Front of Tripura (IPFT) laga Leaders kan jua-jua 2 din alak-alak Central Authorities aro Ministers kan logot Delhi te lok kurise. Aro tai kan state te NRC toh Assam te mana nesena manabole kuribi koi kena kotha janaise.
Etu bejete Mizoram laga kathara NGO kan sob kobi, Young Mizo Association (YMA) bi melekena etu nesena Mizoram kan pora NRC manabole koa laga chis toh tai kan Chritian manu besi thaka jaka te bi manabole kuribi koi kena janaise. Aro etu oporte Nagaland Unit laga Janata Dal (United) kan porabi etu NRC toh tai kan Tribal jaka kan ke manabole kuribi koi kena janaide thakise koise.
INPT General Secretary Jagadhish Debbarma pora IANS khobor te phone pora Delhi te Thursday din tai kan Register General aro Census Commissioner, India kan ke etu kotha janaidese koi kena janaise. Etu oporte tai kan bi Union Home Minister Rajnath Singh kebi lok kuribole kuri ase koi kena janaise.
Tai koise tai kan khali NRC karne hi kotha kura nahui. Huilebi tai kan bi Tripura Tribal Areas Autonomous District Council (TTAADC) nemite ekta kathara Constitutional ulaidebi, Citizenship (Amendment) Bill, 2016 hataidebi, TTAADC te Inner Line Permit (ILP) ulabole kuribi aro tai kan Tribals’ Kokborok kotha toh 8th Schedule Consitution bitorte anedebole kuribi koi kena kotha janaise koise.
