Rio, Tokheho aro PM Modi kotha korise

Dimapur, 14 December: Thursday din Parliament House, New Delhi jaga deh Chief Minister Neiphiu Rio aro MP (Lok Sabha) Tokheho Yepthomi toh Prime Minister Narendra Modi logode kotha kora thakise. Chief Minister pora Prime Minister logode Naga political issue toh joldi koridebole janaideya thakise. Rio pora Prime Minister logode kowah toh, 12^th December deh Nagaland Gaon Bura Federation (NGBF) porabe peaceful march kora thakise. Etu time deh Governor of Nagaland memorandum toh Prime Minister logode debo karni dese. Tai pora Prime Minister logode kushi powah kotha janaideya thakise. Kelay koile NDA Government’s pora lamba din Naga political issue deh jai sabo koikena kotha janaidekena thaga karni. Rio pora be PM logode Kohima jaga laga Ciethu Airport deh kotha kora thakise. Tai pora, Prime Minister Late Atal Bihari Vajpayee pora sob State Capital logode airport bonabole laga wada kora janaideya thakise. Chief Minister pora Silchar-Jiribam-Tupul-Imphal railway project laga deh saijai kena kowah toh, Ciethu Airport project laga daam estimate kora toh railwal project pora be besi komti ase. Tai pora be sanction deri korideya  ke dukh pai thaga kotha janaideya thakise aro tai biswas kora toh, Prime Minister pora etu issue deh personally sabole biswas kori ase. Chief Minister pora be Prime Minister logode pending balance toh olaidebole request janaideya thakise. Rio pora Modi logode kushi pai kena kowah toh, SPA olabole laga recommendation toh Ministry of Finance pora agae pothaise. Etu deh NITI Aayog pora saijai kena clarification letter toh F.No.M-13048/19(NL)/2015-S-NE dated 8.10.2018 pora dese. Tai pora Prime Minister logode mana poisa toh olabole janaise. Kelay koile jai thaga development kaam khan toh joldi kothom hobo karni. Plan pora kotha hona bechide Prime Minister pora Chief Minister aro MP (Lok Sabha) logode thanks janaise tai laga naam ocha kora karni. Aro tai pora guarantee korise etu issue toh ministries khan logode kotha korikena saijabole.