SHILLONG, January 5, 2019:
Friday te Tenzing Norgay National Adventure awardee, Brian Dermot Kharpran Daly koishe state mining policy toh thik jaga te thakile Meghalaya coal mining ghatna toh rukhabo paribo thakishe.
December 13 din para komti hoile bhi 15 miners khan rat-hole coal mine te fasi kena thakishe.
Meghalaya Adventurers Association laga founding member koishe ami khan poila bhi enika ghatna laga kotha hunishe. Hoile bhi government khan notun mining policies khan anibole etiya bhi serious nai.
Daly bisas kuri as eke eti 15 miners khan toh harai jaishe. Daly toh 1,700 caves discover kurishe aro 1,000 genika map kuri kena ase.
Daly koishe etu fasi kena thaka miners khan toh rescue hubole eku chance nai. Keli koile etu coal mine bhitor te pani juma huwa para dui minute bhitor te he etu 15 miners khan ke murai de kena thakibo.
Daly para kotha add kuri kena koishe ami khan etu miners khan toh Thailand te chokora khan fasa genika nohoi. Etu kotha ami khan bhugibole lagay etu chokora khan toh ucha mati te paishe. Hoile bhi etu miners khan toh dui nohoile bhi char feet manu para bana tunnel te fasi kena thakishe.
Judi etu miners khan toh kunba cave te fasi kena thakile toh ami khan expertise khan loi jkai kena thai khan ke modot kuribole thakishe. Hoile bhi etu toh alag kotha ase. Etu miners khan toh bachibole chance he nai. Ami khan logote expertise khan he nai etu miners khan ke bachabole.
Daly toh Meghalaya te India laga sob para dangor sandstone cave discover kurishe. Etu cave laga size toh 24 para 583 metres lamba length ase. Indian Navy laga ekdam bhal specialized divers bhi etu rat-hole mines te cylinders aro equipments khan loi kena bhitor te jabole na paribo.
Add Comment