Chelsea pora American Star Christian Pulisic ke Borussia Dortmund pora sign korise

Wednesday din te Premier League laga club Chelsea pora American international Christian Pulisic  kinise. Germany laga club Borussia Dortmund ke 58 million pound ($74m) dikena Chelsea pora Christian Pulisic ke sign koriloise. Itia majote Christian Pulisic ke eroupe laga sobse korom korom footballer koikena mani. Christian Pulisic toh 20 sal bacha ase aro taike toh Dortmund ke khali champions League te hi khilibole chance pai ase. kilemane Dortmund coach Lucien Favre pora Bundesliga te Christian oporte England international Jadon Sancho ke hi kusi pai. Hoilebi Chelsea pora Christian ke ito season nimete Dortmund ke loan back ‘koridishe. Aro season khotom hoa pijete tai full time Chelsea laga Player hoijabole ase. “Iman dangor club nimete khilibole chance poa toh moi karoni ektum dangor kotha ase, aro moi ito team ke olop man bi contribute koribole chance poa nimete moi ektum koshis koribole ase.” koikena Christian Pulisic pora koishey. Chelsea laga director Marina Granovskaia pora bhi koshi kotha janaidishe aro koise ki Pulisic toh Chelsea nimete pise dangor ekta influence hobole ase future ke , koikena koidishe. Amikhan eroupe laga sobse phal bacha ke sign kori loa ke pise koshi pai ase koise. Pulisic toh America laga porana Under-17 captain ase aro November 2018 ke tai sobse choto senior side laga Captain hoishe United States nimete. Tai 20 years aro 63 days inaka thakise.