Pulwama terror hamla deh suicide bomber para 40 sepai moraideya deh Pakistan toh etu deh mela eli nai koikena Pakistan Prime Minister Imran Khan para jaanishe. Tai para kowah toh judi India para Pakistan logode hamla korise koile Indian logodebe hamla kuribole ase.
Tai para kowah toh, India para Pakistan logode hamla kuribole manishe koile Pakistan logode aro eku option toh nai. Pakistan para be hamla kuribole olabo.
Imran khan’s para Pulwama hamla opor deh etu kotha janaideya toh first wala ase. Kashmir deh security force logode hamla howah toh sobse beya wala thakishe.
Hamla toh hoile Pakistan-based terror group Jaish-e-Mohammed para kora ase. Sucide bomb toh school deh chara 19 sal, jowah sal terror deh join howah para target kora ase.
Jaish-e-Mohammed logode toh Pakistani army aro Inter-Services Intelligence nohoile ISI para gara support ase pari koikena biswaas ase.
Pulwama terror attack bechide India para United Nations logode Pakistan-based Jaish chief Masood Azhar toh global terrorist bonabole request janaishe. Government para be Pakistan’s toh ekala bonabo karni diplomatic moves suru korishe.
New Delhi deh first steps toh Pakistan logode Most Favoured Nation (MFN) status dekena thaga hataidebole manishe. India para Pakistan logode MFN status toh 1996 sal deya thakishe.
Imran Khan para kowah toh, “Pakistan khan toh phal thakibo karni agae jai ase. Kelay etu nesana kebah ekta toh kuribo. Judi Pakistani laga intelligence thakishe koile ami khan logode debe. Ami khan para tai khan logode action lobo. Ami guarantee de ase ami khan para action lobo. Etu toh pressure thaki kena kowah nahoi. Hoilebe tai khan para Pakistan logode dushman kora karni”.
Tai para aro kowah toh, India para Pakistan logode eku saboot nathaikena aro etu hamla para ke laab babo eku bhabona nakorikena bothnaam korishe. Enaga kaam laga log powah ke kon pagala para be beya kuribole naparibo.
Add Comment