Assam Te Teen Jun Sepahi Ke Foreigner’s Tribunal Pora Indian Citizenship Prove Koribole Koise

February 26: Retired Habildar Mahiruddin aro Army Ajmal Hussain laga retired junior commissioned officer ke Assam (Foreigner’s tribunal) laga court te tai khan laga citizenship prove koribole maatiya laga ekta case bicchete, etu nisina ekta asurit mamla aro olaise.

Etiya bar teenta bhai, Shahidul Islam, Delbar Hussain aro Mizanur Rahman kono Indian Armed force te kam kori thakise, tai khan ke Barpeta District laga local Foreigner’s tribunal pora notice dise ki tai khan laga citizenship prove koribole. Tai khan ke Bangladesh laga illegal immigrants nahoi koikena prove koribole citizenship laga kaokoz khan loikena dekhaibole koise.

Foreigners Tribunal toh Foreigner’s tribunal (order) 1964 laga nijete pora khulishe aro tai khan toh manu khan kon toh desh laga ase, etu jini pabo nimite bonaise.

Etu khobor toh civil society laga kaan te punchise aro etu teenjun sepahi laga ghor te manu khan besi jamma howa dekhise. Sob manu khan pora etu teenjun sepahi bhai aro tai khan laga paa Late Abdul Hamed aro maa Khudeja Khatun aro dangor kokai Rustam Ali khan logote khilaf Foreigner’s tribunal pora enika harkat koriya nimite bodnam korise.

Desh nimite jaan diye kena larai koriya khan logote  khilaf enika sorom khelai diya manu khan pora sawal korise.

Etu mamla te, Shahidul Islam, etu teenjun sepahi bhai majote sobse dangor pora koise  “Etu toh moi khna nimite besi mon bekha laga kotha ase. Moi khan toh najane ki desh laga dushman logote larai koribo na moi khan laga nationality ke nammaniya court logote larai koribo”.

Etu bi ase ki etu teenjun sepahi bhai khan laga paa – Late Abdul Hamed ke bi tribunal pora notice dikena tai laga naam toh National Registrar of Citizens (NRC)- 1951 te halise, etu NRC te Assam te foreigners khan te thuribo laga cut off date toh 25th March, 1971 thakise. Etu ghor manu khan pora tai khan laga naam toh electoral records te 1970 pora 2018 tak ola dekhaise.

Kolkata Based regiment laga Senior Army officer pora bi Chief Minister of Assam, Director General of Police, DC aro Barpeta District laga SP ke etu case phat hatai dibole lekhise kile koile etu pora Army manu khan desh nimite kam koriya pora mon alchi koridibo, hoilebi etiya tak etu chitti laga ekko jawab diya nai.

Assam te konoba minority dharam laga manu khan etu nisina diktari toh besi lamba samoy log pai ase. Tate demands enika thakise ki D- Voter (Doubtful Voters) khan laga status ke bhai pora sabo laage koikena. Etu nimite besi manu khan etiya court aro detention camps te dukh pai ase.