MIAO | February 26: Changlang District laga konoba welfare societies logote Tangsa Students Union pora ekdum shanti laga candlelight rally arofundraising manaise, Etu to Miao te 25 February te police pora firing koriya te moriya jarjun chokra khan laga ghor manu khan ke modot dibo karne.
District Tangsa Student Union laga President, Sengman Ronrang pora koise, “Ahiya laga generations nimite ami khan laga jarjun mon dangor manu khan pora tai khan laga jeevan dise. Tai khan pora tai khan laga jeevan diya nimite Arunachal Government pora State Assembly te Permanent Citizen Bill toh aro wapas nadibole fesla loise, manu khan laga iccha ke maanikena”.
“Moriya jeevan toh wapas zinda ketiya bi na ahibo hoilebi tai khan toh moi khan laga mon te hotai karne thakibo. Moi khan ekki logote khara korikena ahiya samoy nimite aji tai khan lagfa jeevan diya manu khan laga ghor manu ke modot koribole laage”, tai pora welfare societies ke besi modot diya nimite dhanyabad diye kena koise.
Etu shanti rally te 500 jun manu khan nisina hisa loise, tate Women’s Welfare Society, Yobin Welfare Society, Yobin Youth Association, Galo Welfare Society, Tagin Student Union, Singpho Women Organization, Muklom Elite Society, Singpho Development Society, officers, public leaders aro Church representatives khan bi milai kena thakise.
Ms. Pinna Kitnal, district laga ekjun women leader pora koise, “Moi khan kon logote bi khilaf nahoi. Moi khan shanti ke khusi powa jaat ase. State laga manu khan laga iccha ke hisab nakurikena dara-dari fesla lowa aro jarjun jowan manu laga jaan jowa toh aaram pora rukhaibo paribo thakise. Moi khan moriya jowan chokra khan nimite jaam hoise aro mon dukh te thakiya ghor manu khan logote ekki logot khara koribole ahise”.
Rally khotom howa laga jakka te ekta ollection box rakhikena thakise, tate sob manu khan mon khusi pora kiman pare poisa halibo karne.
Teen din ekdum biya pora chamela ola bicchete Arunachal laga halat toh wapas bhal hoi ase. Etu chamela te bathor pheka, firirng aro state laga Deputy Chief Minister laga private ghor jula dekhise.
Government pora indigenous nahowa manu khan ke Permanent Residential Certificate dibole fesla koriya logote khilaf korikena protest koriya samoy te ekjun manu ke 22 February te goli pora marikena morai diya aro teen jun protesters ke etu din bicchte police firing te morai diya bicchte halat ekdum biya hoise.
Ajanak pora etu hatsa howa nimite, Government pora moriya ghor manu khan ke Rs. 20 Lakh dibole koise aro moriya manu laga ghor manu khan ke Government job dibole koise aro jokhom powa manu khan ke 10 Lakh dibole koise.
Add Comment