Macau, 30 May : Chinese MMA fighter Shi Ming Road to UFC Season 5 te India laga Puja Tomar ke dominant victory logot harai dise. Macau laga Galaxy Arena te hoithaka strawweight bout te Shi Ming first round te submission victory hasil korishe.
Fight tu khub taratari end hoina, post-fight interview te Shi Ming laga comments online te viral hoise. Victory pichete tai khali fight laga kotha kuanai, Indian cinema aru especially Dangal laga influence uporte emotional kotha patise.
Shi Ming, kun professional fighter logot ekta internal medicine doctor bhi ase, tai koi dise ki Dangal tai laga combat sports journey te dangor inspiration hoise. Tai hasi-mojak te etu bhi koi dise ki tai nijor life story bhi sequel paibole worthy ase.
2016 te release hoithaka Dangal te Aamir Khan wrestler Mahavir Singh Phogat laga role play korise. Film te tai laga daughters Geeta Phogat aru Babita Kumari ke world-class wrestlers bonabo laga story dikhai dise. Film te Fatima Sana Shaikh, Sanya Malhotra, Zaira Wasim, Sakshi Tanwar aru Aparshakti Khurana bhi important roles te ase.
Dangal China te bishi popular hoise karon tai laga emotional father-daughter story, underdog theme aru women sports athletes laga struggle. Reports hisab te China market te film around ₹1,295 crore earn kori dangor success hasil korise.
Shi Ming MMA world te alag karon tai ek successful fighter logot doctor bhi ase. Itu karone bishi fans tai ke “The Doctor” ba “Dr Sleep” kuina mati thake.
