Margao, 8 June : Grace Dangmei para international football pora retirement announce korise
Veteran forward Grace Dangmei para Saturday te international football pora retirement announce korise, juntu pora India Women’s Football Team logot tai laga 13 saal laga successful career khotom hoi jaise.
Etu announcement tu India para Bangladesh ke 3-1 pora harai kena SAFF Women’s Championship 2026 final jita piche ahise. Pandit Jawaharlal Nehru Stadium te khela etu final pora India sat saal piche aru ekbar regional title ghuri pai loise.
Final whistle bajikena match khotom hua logote, emotional Grace para nijor teammates khan ke japi dhorise, juntu somoy India camp te dangor celebration choli thakise.
Etu victory tu India women’s football laga ekjon most influential players majot ekta thaka Grace karne perfect farewell bani dise.
2013 te senior team karne debut korikena, 30 saal umor Grace para India karne 95 international matches khelise aru 24 goals bhi korise.
Tai laga international career bhitor, Grace para tinta SAFF Women’s Championship titles aru duita South Asian Games gold medals jitisey. Etu achievements pora tai India national setup laga most experienced players majot ekjon bani jaise.
