Yatsushiro, 30 June : India laga campaign Badminton Asia Junior Mixed Team Championships te quarterfinal stage te khotom hoi jai ase. Tai khan Monday din Hong Kong logot 2-1 pora hari jai ase.
India opening set te khub bhal start paisey. Dev Ruparelia aru Tanvi Patri duijon laga performance pora India duita matches pichete 22-12 lead loise.
Doubles combinations khan bhi bhal khelise aru kunba problem nathaki set tu 55-44 pora jitise.
Kintu second set shuru hua logote Hong Kong match tu ghurai anise. Can Yee Hei Dev Ruparelia ke 11-8 pora haraisey, aru IP Sum Yau lead tu 22-16 loina barhai dise.
India laga doubles combinations deficit kom koribole parianai aru match tu deciding set te jai ponchise.
Decider te Dev Ruparelia phir India ke lead dise ketia tai Chan ke 11-9 pora haraisey. Kintu Ip score difference kom kori Hong Kong ke 22-21 usor loi anise.
Mixed doubles te Bjorn Jaison aru Dianka Waldia India ke age rakhise. Tai khan laga match Cheung Sai Shing aru Wing Chi Chu logot 11-11 draw hoina khotom hoise, aru India 33-32 lead te thakise.
Kintu Tanvi Reddy Andluri aru Baruni Parshwal Chu aru Yi Kiu Yu logot 5-11 pora hari jai ase. Etu defeat pichete India comeback koribole parianai aru set tu 55-43 pora hari tournament pora bahar hoi jai ase.
