New Delhi, 2 July : Netflix documentary Skywalkers te feature hoa daredevil couple Angela Nikolau aru Ivan Beerkus etiya phir headlines te ahi ase. Duijon Wednesday din New York City laga Empire State Building te ekta climbing stunt kori khobor te ahise.
Hot New York afternoon somoi, surprise aru unannounced climb tu shuru hoa logote bystanders aru pedestrians khan confuse hoina uporte sai thakise. NYPD ke turunt scene te matise, aru police officers khan tai khan logot kotha patibole try korisey, kintu ki kuri thakise etu bujhanai.
Pichete, duijon building laga uporte ponchise aru ekta banner khuli dise. Banner te likha thakise, “When the power of love beats the love of power, the world knows peace.” Tai khan eki logot kunba kisses bhi share korisey.
Angela Nikolau, kun 33 saal umor ase, aru Ivan Beerkus, kun 32 saal umor ase, pichete aste-aste building pora nama shuru korisey.
Kintu stunt tu tatey khotom hoa nai. Kunba meters nami pichete ekta platform te thakia somoi, Beerkus engagement ring loi Nikolau ke propose korisey.
Nikolau “Yes” kuina jawab dise aru engagement ring pindhi Beerkus logot nami ahise.
ABC7 Eyewitness News hisab te, lagbhag 1 PM EDT somoi duijon ground te poncha logote NYPD officers khan tai khan ke custody te loi jaise.
Angela Nikolau aru Ivan Beerkus Russian skyscraper climbers ase, juntu duniya laga bishi famous buildings scale kori ase.
Angela circus artists laga family te jonom hoise. Chutu somoi te tai rhythmic gymnastics korisey, aru pichete skyscraper climbing shuru korisey. Moscow laga skyscrapers rooftops pora unusual photos upload kori social media te khub viral hoi jai thakise.
Ivan Beerkus logot tai laga first documented joint climb 2016 te hoise. Duijon China laga Tianjin te thaka Goldin Finance 117 scale kori thakise, juntu etu somoi duniya laga sob pora ucha construction projects majote ekta ase.
Beerkus Eiffel Tower, Shanghai laga Shanghai Tower aru Shenzhen laga Shun Hing Square nisina famous buildings bhi climb kori ase.
Tai khan ketia dating shuru korisey etu clear nohoi. Angela age Danish documentary On the Edge of Freedom aru Slovak documentary Who Is Next te bhi feature hoise.
Netflix documentary Skywalkers: A Love Story te tai khan laga relationship dikhai dise, juntu skyscrapers scale koribole tai khan laga common passion pora shuru hoise.
Aru July 1 din, Empire State Building laga uporte tai khan officially engagement kori dise.
