Agartala | April 12: Tripura te Congress pora April 11 te West Tripura constituency nimite 1st phase polling khotom howa bicchete konoba polling stations khan te repoll koribo karne demand korise. CPI-M General Secretary, Sitaram Yechuri pora bodnam korikena koise ki April 11 te sob milaikena 1679 polling stations majote 460 booths toh podli korise, voters khan ke bhoi khelaise aro etu jakka charikena jabole dhamki dise aro Left political parties khan laga agents khan ke BJP workers khan pora booths laga bithor khusibole diya nai.
Tai pora koise ki, pohoila CPI-M laga ekta team pora ECI laga pura team ke konoba booths khan te central sepahi khan rakhibo nimite demand korikena ekta memorandum dise aro tai khan pora etu koribo koikena wada korise.
“Hoilebi central forces khan toh booths te dekhiya nai. Tai khan konobi thakiya nai, aro etu hobo pare ki central aro state government milikena ase. Moi khan pora 460 booths khan te repoll thakibole demand korise”, Yechuri pora press conference te koise milaikena koise ki “Democracy ke aji toh ekdam mittai dise, etu nimite moi khan pora etu booths khan te repoll demand korise.”
Congress Candidate Subal Bhowmick, pora ekta news conference te koise ki bhoi khela aro dhamki diya toh poll din laga pohoila raati pora shuru korise, tate ruling BJP laga goonda khan joborjosti pora Congress supporters khan laga ghor te khusi kena tai khan ke dhamki dise ki juti tai khan booths te jaise koile nahobo koikena.
“Moi khan pora phat DGP, A K Shukla aro Chief Electoral Officer (CEO), Sriram Taranikanti ke resignation dibole demand kori ase kile koile tai khan pora jaanikena etu kaam koribole dise. Police khan toh booth te podli koriya khan ke chup-chap sai thakise. Aro tweijun bi BJP nimite kaam korise”, Bhowmick pora koise.
Add Comment