New Delhi, 03 July: Rahul Gandhi Congress President laga post para resign howah nemide Motilal Vora ke interim party chief nemide junise.
Congress Constitution hesab deh, Motilal Vora, party laga senior-most General Secretary toh Congress Working Committee (CWC) laga next meeting nahowah tak interim President nemide thakibole ase.
Interim chief nemide juna opor deh Vora para tai toh etu opor deh eku khobor najani kena thakishe koise.
90 sal Vora ke toh Gandhi family laga close hobo pari koikena biswaas ase. Tai toh 1985 to 1988 tak Madhya Pradesh laga Chief Minister thakishe. Etu agae deh tai toh union cabinet laga minister thakishe. Tai be 1993 to 1996 tak Uttar Pradesh laga Governor thakishe.
Party chief nemide besara opor deh Sushil Kumar Shinde aro Mallikarjun Kharge toh top contenders deh ase.
Judi party chief nemide charge loise koile etu toh third par wala hobo Nehru-Gandhi family para charge nalowah. Etu agae deh PV Narasimha Rao aro Sitaram Kesri para charge lowah thakishe.
Wednesday deh Rahul Gandhi para be tai resign howah tweet kora thakise aro tai para Congress party deh serve kora toh honour ase koise.
Tweet nakora agae deh tai para reporters khan ke party para notun president toh deri nakorikena joldi junibo lagi kowah thakise.
Add Comment