DIMAPUR, SEPTEMBER 14 : Nagaland Governor Shri PB Acharya pora Master Jason Whuorie, Master Kekhriezhazo Rino, Master Limatemjen N Jamir aro Master Keneikhriezo Sanchu, Greenwood Higher Secondary School, Dimapur kan ke khushi baa aro salam diya janaide thakise. Kele tai kan pora tai kan School Science Exhibition nemite ekta Genset-Powdered Car koi kena chis banabole bara nemite.
Etu 4 jun Students kan ke Principal Shri Uttam Basak aro Project laga Teacher Guide Shri Sukumar Pradhan kan Governor osorte Raj Bhavan Kohima te September moina darek 14, 2018 te jai kena lok kurise. Etu time te Governor pora etu Students kan laga bhal kam dekhe kena aro hune kena besi khushi baise. Kele tai kan laga bhal kam porahi etu Indigenous Cart Automobiles ulabole bara huijaise koi kena. Aro tai kan edia toh “Skill India”, Prime Minister India, Shri Narendra Modi laga bhal babuna kebi naam te ahejabole hisabte huijaise koise.
Governor PB Acharya porabi etu Science Exhibition porahi etu Students kan laga dimak (talents) toh lukai kena thaka edia toh ulaijaise. Aro etu toh besi bhal laga kotha ase koi kena janaise. Aro etu notun chis ulabole bara bi Science, Technology aro Engineering nemite husir pora hutai sabole kura karne hi bara laga ase koi kena janaise. Aro etu oporte tai bi etu ekjun-ekjun ke aro ki-ki chis nemite kam kuribole hisha kurikena thaka porahi bhal dimak bai ase. Aro etu porahi Science Exhibition nemite bhal hui ase koi kena janaide thakise.
Tai bi Students kan ke etu nesena bhal te mon de kena kam kuri kena thakibole janaise. Kele etu porahi kali-borsong Development nemite ami kan state te bhal kam kan etu dimak pora julai kena ahkete luijabole ase koi kena. Tai bi Students kan ke alak-alak Schemes aro programmes kan Sorkar (Centre) laga kan toh tai kan (Students) nemite besi bhal hobo laga ase. Etu karne etu kan nemite husir kurikena bhal kam aro kuribole kuribi koi kena janaide thakise.
Governor Acharya porabi Principal aro sob Teachers kan Greenwood Higher Secondary, Dimapur laga kan pora Students kan ke etu nesena kam kuribole karne motub kura aro mon dangor kura karne besi khushi baa (valued) janaise. Aro etu nesena din Science Exhibition toh ahebole laga din te bi manabole lagi. Kele etu porahi Students kan ke ahkete bhal dimak pora anedebole bara huijabo koi kena. Tai bi etu nesena bhal kam pora etu School kan toh ahebole laga din te bhal te ahejaa hobo bari aro ami kan Nagaland state nemite aro India desh nemitebi ekta sundur babuna jaka te luijabole bari koi kena janaide thakise.
Governor Acharya porabi etu Greenwood Higher Secondary nemite ekta Awards laga naam pora poisa Rs. 1 lakh poisa dedse koise.
Add Comment