Somalia hotel hamla te 16 manuh morishe

Mogadishu: August 18, 2020. Monday din te government official para koishe ke, komti hoilebi 16 manuh morishe, etu pithor te police officer aro dozen manuh neshina jokom paishe. Mogadishu laga capital city te al-Shabab terror group khan para hotel ekta te hamla kura ase. Government laga spokesman Ismael Mukhtar Omar para koishe ke, Shabab fighters laga pas(5) jun manuh be security forces hath para morishe. Hamla kura manuh khan para toh Lido Beach te thaka Elite Hotel pithor te jaikena marishe koikena Xinhua news agency para khobor toh janai thishe. Spokesman, Ismael Mukhtar Omar para aro koishe ke, “sob melaikena, Elite Hotel hamla kurikena manuh moria toh 16 jun ase. 16 manuh pithor te 5 jun manuh toh hamla kura khan ase, etu pithor te rescue operation samay police officer ekta be morishe. Hamla kura khan para aro Information and Defence Ministries laga tuita(2) senior officials be morai thishe. Omar koishe ke, hamla te18 manuh jokom paishe. Medical charity, Aamin Ambulance para olop age ate 28 manuh jokom paishe laga khobor toh nahoi koishe. Government official para koishe ke, Somali special forces khan para 205 manuh ke hotel pithor para pachaise, etu oper te hotel malik be thakishe, tai toh lawmarker ase koishe. Tai para aro koishe ke, Elite Hotel te al-Shabab laga sepia khan toh kenaka pithor te jaboli parishe etu khobor toh sai ase koishe. Hamla kura manuh khan para Sunday din te gari(car) te bomb botaikena hotel laga gate tuh oraithise aro pithor te jaishe koishe. Etu samay, Special Sepia khan chaka te ahikena manuh khan ke motob kurishe.