NEW DELHI, SEPTEMBER 22 : Khobor hisabte Shri Imtikumzuk Longkumer, Advisor, Sericulture aro Excise, Government of Nagaland laga aro Nagaland Legislative Assembly laga Deputy Speaker toh jua kali sam, 22nd September, 2018, 6:08 pm paji te murise. Etubi New Delhi, Apollo Hospital te boila porahi sabole luijai kena thaka. Aro tai mura toh Kidney bhal te nathaka pora ase bari koi kena, khobor hisabte koise.
Etu Advisor toh NDDP MLA, 26 Aonglenden Assembly Constituency, Mokokchung District pora ase. Aro khobor hisabte tai mura laga kao toh Sunday din aji Dimapur Airport te punjibole ase. Aro tai mura nemite State Funeral toh Ungma bosti, Mokokchung te Tuesday din, September 25 te manabole ase koise.
Governor mondukh kotha janaise
Nagaland Governor Shri PB Acharya pora ajanak te murijaa Shri Imtikumjuk Longkumer mura karne mondukh baa kotha janaise. Etu ke tai etu murijaa Advisor Imtikumzuk toh ami kan Naga manu nemite ahkete luijabole karne besi bhal pora kam kurikena aha manu ase. Aro etu bhal kam kan nemite ahebole laga din te sob yaat te rakhibole ase koi kena janaide thakise. Aro etu Advisor mura porabi ami kan Nagaland manu kan nemite ekta dangor aro bhal leader murijaa nesena ase koi kena janaise.
Governor Acharya porabi etu mura khor manu kan ke besi mondukh baa kotha janaise. Aro etu nesena ajanak chamala te Isor porahi bhal te rakhibole debi koi kena tai prathana te yaat kura janaide thakise koise.
Etu oporte CM Nephiu Rio aro Deputy CM Y Patton, aro NDPP Party kan sob porabi tai mura nemite mondukh kotha janaise koise.
Add Comment