Tripura government para notun guidelines janaishe

April 9, 2021. Tripura te notun Covid-19 cases besi otha nemite government para notun guidelines junai thishe koishe. Government para tuita(2) notifications te notun guidelines aro hoshari neum janaishe. State government para aro alag-alag hoshari neum toh government offices aro public jaga te virus spread kori thaka nemite rokaboli kam koribo. Chief secretary para koishe ke, divisional aro sub-divisional magistrates para public jaga te sensitize koribo, masks lakaboli, social distance koriboli aro dosura Covid-19 neum toh loudspeakers te junaikena perabo koishe. State health department aro police melikena enforcement drives kora samai kaun manuh para guidelines toh namanibo, tai khan logot fine koribo koishe. Agartala Municipal Corporation aro dosura urban civic bodies logot manuh besi thaka jaga neshina offices, schools aro colleges te hotai din saikena perboli janaishe. Notification hesab te, official meeting toh 20 jun manuh oper te nathakibo aro etu samai manuh pithor te komti hoilebi 1 meter oper te mask lakaina bohiboli koishe. Government programmes toh Pragna Bhawan, Town Hall, Rabindra Satabarshiki Bhawan aro dosura public halls te thakiboli mana korishe. Government aro residential offices te visitors khan toh ek paar te 1 jun jaboli koishe. Etu oper te kaun manuh positive thaka manuh logot contact thakibo nejor tested koriboli janaishe. State government para sports aro competition mana hoboli koishe. Entry points sob jaga te thermal screening toh jaalu thakibo. Notification hesab te, Mask Enforcement Day toh hotai Saturday din te thakibo aro teams khan para manuh besi thaka jaga neshina markets, shopping malls te jaikena manuh khan logot neum toh janai thibo, etu neum toh Tripura Epidemic Disease COVID-19 Regulations, 2020 pithor te janaishe. Gyms, recreation centres aro government buildings te crèches toh bondh thakiboli koishe. Etu oper te kaun manuh khan higher risk te thaka neshina umer tangor employees, pregnant employees aro employees medical elaj kori thaka khan ke besi hoshari thakiboli janaishe. Etu hokom toh joldi para kam koriboli ase koishe.