Mizoram:African Swine para 4,650 gahori morishe

May 30, 2021. African Swine Fever (ASF) bemari ola beche te, Mizoram te itya dak etu bemar para 4,650 gahori aro bacha morikena ase koishe.  Animal husbandry & veterinary science department laga  joint director, Dr. Lalhmingthanga para Saturday din te koishe ke, Saturday din ekla te 40 gahori morishe aro aji dak te African Swine Fever (ASF) bemari ola beche 4,650 gahori aro bacha morikena ase etu nemite Rs. 18.60 crore neshina loss hoikena ase. Tai koishe, African Swine Fever (ASF) bemar para ghori 1^st mora toh March 21 darik Lungsen bosti south Mizoram’s Lunglei district, Bangladesh border osor te thakishe. Etu beche te gahori bemar toh komti hoilebi 9 9 districts- Aizawl, Lunglei, Mamit, Serchhip, Lawngtlai, Khawzawl, Hnahthial, Siaha aro Champhai te pheli jaishe. State laga 11 district pithor te , Kolasib aro Saitual districts te itya African Swine Fever (ASF) bemari toh nathaka hoishe. 9 districts te 91 bosti aro osor jaga toh “bemari jaga” junaikena ase, etu oper te Aizawl district te sobse besi 55 bosti te bemari toh ase, etu beche Lunglei district te 26 bosti te bemar toh jai ase, koikena Dr. Lalhmingthanga para khobor toh janaishe. Itya dak 91 jaga te bemar hoikena thaka te gahori laga population toh 32,108 neshina ase. Official para koishe ke, department logot khobor powa toh ASF bemar thaka jaga nahoikena dosura bahar jaga te ajanak para 100 gahori mora khobor ase, hoilebi etu ASF suspected korishe aro gahori mora nemite khobor toh pesari ase. Mizoram para inter-state borders toh Assam, Manipur aro Tripura state logot share korikena ase aro Bangladesh aro Myanmar logot international boundaries ase. ASF bemar toh janwar aro umer sob logot phelina jowa bemari ase. Hoilebi, Experts para kowa toh etu bemar toh janaw para manuh logot nalaki koishe. Itya dak te etu bemari nemite virus bonaikena nai koishe.