Naharlagun te Drug kingpin thurishe

Arunachal Pradesh: Itanagar Capital Region (ICR), Arunachal Pradesh te drugs bekire kora te eku jun manuh Joseph Kino ke pesari thaka toh Capital Police para Friday din tai laga ghor –Sector, Naharlagun te thurishe, koikena khobor para janaishe. Tai laga ghor check kora samai Police para heroin146.41 grams paishe aro etu oper te police para aro Rs 1.50 lakh cash, tuita(2) laptops, tuita(2) iPhone, iPad aro 5 android mobile phones paishe koishe. Naharlagun laga SDPO,  Dekio Gumja para reporters logot koishe ke, Joseph Kino toh ICR te besi tangor drug dealer ase, tai oper te khobor powa nemite thurishe. Tai aro koishe, Naharlagun Police Station te etu manuh oper te case (No 89/21) under Section 21 (b) NDPS Act te registered hoishe aro tai ke police custody te aro investigation nemite rakina ase. “Thursday din te tai laga khobor toh paishe, etu nemite team ekta Officer In-charge (Inspector) Khiksi Yangpho aro Sub-Inspector SS Jha para loikena Kino laga ghor toh check korishe,” tai para khobor toh janaishe. Circle Officer, Laxmi Dodum osor te drug samples laga sealing aro packaging toh korishe koishe. Gumja  para koishe, etu drug-peddlers khan neshina para besi tangor chain bonaikena manuh samil kori dey. Main dealer khan para drugs toh ghor te naraki hoilebi dosura jaga te raki thaki koishe. “etu drugs thiboli toh tai laga boy para customers logot jaikena pongchai, etu nemite ami khan besi dukh korikena thurishe,” tai para aro koishe. Gumja para aro janaishe ke, etu mauh toh  ICR pithor te police stations besi te pesari thakishe koishe.