June 26, 2021. Assam Government para tinta(3) districts aro 1 sub-division te COVID-19 positive cases besi othi-thaka nemite total lockdown junaishe. Total lockdown toh Goalpara, Biswanath, Morigaon districts te aro Bokakhat sub-division, Golaghat te Monday din June 28 darik para soruh hoboli janaishe. Etu khobor toh Assam Health Minister Keshab Mahanta para Friday din Guwahati te koishe. Etu tinta(3) districts aro sub-division te lockdown toh 1 hafta nemite thakibo. Media logot kotha kora samai, Keshab Mahanta para koishe ke, “Assam te bemari toh 247 jaga thurikena ase. Etu samai Kamrup-Metro district te COVID-19 halat toh bhal hoi thaka nemite curfew timing toh komti korishe. Kamrup-Metro district te curfew toh saam 4 PM para loikena pujur 5 AM dak thakiboli janaishe. Puila Kamrup-Metro te curfew laga samai toh 2 PM para aha din 5 AM dak thakishe. Etu oper te districts te dukan toh hotai din 3 pm dak kula thakiboli koishe. Puila dukan toh aro dosura business establishments toh 1 PM dak kuli thakishe. Etu samai, Assam te inter-district movement toh July 4 darik dak bondh thakishe, koikena notun order hesab te janaishe. Assam te COVID-19 bemar para aro 26 manuh morishe aro 2793 notun positive cases toh 24 gonda pithor te thurishe. Friday din dak te COVID-19 positivity percentage toh 2.01%, thakishe koikena Assam health minister laga datat hesab te janaishe. Etu notun COVID-19 cases pithor te, Kamrup Metro district te sob melaikena 165 cases thurishe koishe.
Assam: 3 districts aro 1 sub-division te Monday para curfew
