AIZAWL: Assam-Mizoram border te halat besi beya howa nemite tuita(2) state para security khan toh border te ahikena halat toh sai ase koishe. Mizoram deputy inspector general of police (Northern Range) Lalbiakthanga Khiangte para koishe ke, halat toh besi beya jai ase ke tuita(2) side laga jawan toh larai olaboli neshina ase koishe. Tai koishe ke, tuita(2) state laga jawan be border te ahikena ase aro Mizos khan para Assam pithor te 6 km ahikena ase kowa khobor toh mesa ase janaishe. “Mizoram laga jaga Phainuam’s Buarchep bosti osor Vairengte jaga te rasta bonai thaka toh Assam para ase, etu jaga toh besi saal para Mizos manuh laga ase,” koikena tai para koishe. Assam te grenade putaishe kowa kotha toh mesa ase. Olop din akhe state chief secretary Lalnunmawia Chuaungo para home ministry logot koishe ke Assam te Mizoram manuh para Assam jaga te ahikena ase kowa toh mesa khobor ase janaishe. Additional secretary (NE), ministry of home affairs logot letter te Chuaungo para janaishe ke, konuba Buarchep bosti manuh, Mizoram’s Kolasib district te bohi thaka khan ke Assam khan para hamla korishe aro tai khan laga kethi beya korishe aro notun rastha toh Assam police aro officials para excavators loikena bonaishe. Mizo farmers para tai khan laga mathi aro kethi pajabo nemite horu barricades bonaikena thaka toh Assam officials para beya kori thishe. July 12 darik te Mizoram home minister Lalchamliana para Assam government logot saman beya kora nemite compensation koriboli koikena ase.Etu samai, home department official para koishe ke, Assam manuh khan para Mizoram laga mathi toh loboli naparibo, keli koile tuita(2) state te be inter-state boundaries neum ase. Assam para hotai samai status quo neum beya korikena inter-state border te ghor bonai thaka nemite tuita(2) osor states te jamila olai thaki koishe. “jodi Assam para tai khan laga mathi toh loi ase koile, ami khan para be koboli kotha ase, keli koile ami khan laga line reserve forest toh Assam para loikena ase,” koikena etu khobor toh official para janaishe. Tai para aro koishe ke, Assam para tai khan laga mathi ase koi thaka toh besi century para Mizos manuh bohikena ahishe. Mizoram para Assam logot 164.4 km border share korikena ase. Itya border laga jamila toh June 29 darik para olaikena ase, Assam police para Aitlang hnar jaga Vairengte para 5 km jaikena thaka toh loikena ase aro etu bosti toh Assam para sobse osor jaga ase koishe. Etu jamila jaga toh July 10 darik te Assam police aro officials para jaikena Buarchep bosti te plantations beya korishe aro Phainuam jaga Kolasib district te rasta bonaikena ase koishe.
Assam-Mizoram border te halat beya jai ase
