July 23, 2021: Mizoram te alag-alag tinta(3) Covid-19 variants toh 75 Covid-19 bemar manuh logot thurishe, koikena Wednesday din health department official para janaishe. State nodal officer & official spokesperson on Covid-19 Dr. Pachuau Lalmalsawma para koishe ke, India’s Delta variant (B.1.617.2), 73 cases aro United Kingdom’s Alpha (B.1.1.7) aro Eta(B.1.525) bemar toh 100 samples test kora te thurishe koishe. Etu samples toh National Institute of Biomedical Genomics (NIBMG), Kalyani, West Bengal te etu saal June moina te puta te thura ase koishe. “100 samples pithor te 73 cases toh Delta variant Covid-19, ekta Alpha variant aro dosura ekta toh Eta variant of Covid-19 ase, koikena tai para khobor toh janaishe. Etu 73 cases thura te 56 cases toh Aizawl district para ase, etu beche Lunglei district para 9 cases, Kolasib district para 5 cases aro Serchip district para 3 cases thurishe koishe. Alpha aro Eta variants toh Aizawl district para ase koishe. Tai para aro koishe ke, 70 samples toh Aizawl district para ase, Lunglei, Kolasib aro Serchhip districts para 10 cases toh jama korikena NIBMG te genome sequencing nemite jowa moina putaishe. June 18 darik te, Mizoram te Delta variants toh 217 samples test kora te 4 cases thurishe. Hoilebi, etu 4 jun bemar manuh toh Aizawl district para ase aro itya tai khan bemar bhal hoikena ase. Pachuau laga khobor hesab te 69 samples toh whole-genome sequencing nemite NIBMG te March moina te putaishe aro April te 217 samples aro June moina te 100 samples putaikena ase. Etu oper te 150 samples toh aro July 15 darik te putaikena thaka toh khobor roki ase. Tai para janaishe, government toh mon thikena state te dosura Covid-19 variant cases toh pesari ase koishe. Tai para state laga manuh khan ke experts khan laga kotha manikena hokom toh strict para jolaboli janaishe. Itya State te Delta variant rate toh .1 percent ase, Alpha variant2 per cent ase aro Eta variant toh 2.7 per cent hoikena ase koishe.
