July 29, 2021. Manipur police para 4 jun Zeliangrong United Front (Kamso) laga cadres ke Imphal East district para thurishe koikena khobor para janaishe. Police para koishe ke, tribal militants thaka laga khobor powa nemite Imphal east district police aro police commandos joint team para New Chekkon jaga Imphal east district te search operation kora samai thura ase koishe. Operation samai police team para 4 jun ZUF (K) militants ke thurishe koishe. Police team para tai laga hath te bantok aro dosura saman toh paishe, koikena Imphal east SP N. Herojit para khobor toh janaishe. Tai para aro koishe ke, etu manuh khan toh alag-alag kam neshina railway construction companies aro NH 2 Manipur, Assam aro Nagaland rasta te gari pera logot poisa otha te samil ase koishe. Etu thura manuh 4 jun laga nam toh D. Golmei, G. Ruangmei, J. Golmei aro Makindin Golmei ase koishe. Preliminary interrogation kora samai, tai khan para Noney koikena jaga ekta te saman toh rakina thaka janaishe. Etu manuh khan para team ke jaga te loikena jaishe aro police commandos aro personnel 10 Assam Rifles melikena Noney district te search operations korishe. Herojit para koishe ke, team khan para HK 33 rifle logot ekta magazine tuita(2) RPG launchers aro self-loading rifle ekta paishe koishe. Etu rebels oper te case registered korishe. Dosura incident ekta te Imphal west district police commandos para Kanglei Yawol Kunna Lup (KYKL) militant ek jun ke Singjamei jaga para Friday rati thurishe aro etu rebel laga nam toh Joyson Abonmei thakishe koikena janaishe.
Imphal te ZUF (K) militants 4 jun thuirishe
