August 22, 2021. Sunday din Meghalaya te 24 gonda pithor te Covid-19 bemar para 9 jun morishe aro 317 notun positive cases thurishe. Etu notun cases melaikena Meghalaya te Covid-19 positive tally toh Sunday din dak te 73,765 te othishe. Sunday din sob melaikena 382 Covid-19 bemar hoikena thaka toh bhal hoishe koishe. Etu oper te State te aro sob melaikena 69,425 manuh bemar bhal hoishe. Meghalaya te bemari para itya dak te 1,278 manuh morikena ase aro sob melaikena 3,062 active Covid19 cases ase. Saturday din te Covid-19 bemar para 8 jun morishe aro 231 positive cases ase. Meghalaya NHM data hesab te itya dak sob melaikena 12,80,979 manuh ke Covid-19 vaccines thikena ase aro Saturday din 6,732 manuh ke Covid-19 vaccine doses loishe. Etu oper te 6,732 manuh ke Covid-19 doses thishe aro Saturday din 18 umer oper 4,625 manuh ke vaccine thishe aro 45 umer 1,461 manuh ke vaccine thishe. Saturday din te aro health workers 91 aro 55 frontline workers khan Covid-19 vaccine doses loishe. India te sob melaikena Sunday din dak te 58 crore Covid19 vaccination loishe. India te 24 gonda pithor 52 lakh doses loikena ase aro etu samai 30,948 notun Covid19 cases thurishe. India laga active caseload toh itya 3,53,398 te ase aro etu 152 din pithor te sobse komti ase koikena Union health ministry laga data hesab te khobor toh janaishe.
Meghalaya te Covid para 9 jun mora aro 317 notun positive cases khobor
