Meghalaya, Assam CMs para inter-state border nemite kotha korishe

GUWAHATI: Thursday din te Assam aro Meghalaya Chief ministers para inter-state border issue nemite kotha korishe. Chief ministers pithor te meeting toh virtually thakishe koishe. Assam chief minister Himanta Biswa Sarma aro Meghalaya CM Conrad Sangma logot nejor states laga senior official be samil thakishe. Tinta(3) regional committees laga Chairmen aro members jowa moina te formed kora khan be virtual meeting samai thakishe. Meghalaya CM Conrad Sangma para koishe ke, tinta(3) regional committees khan para report toh October 20 dak te toh submit hoboli janaishe. “tuita states laga tinta(3) Regional Committees laga Chairmen para meeting koribo aro etu samai stakeholders logot kotha koikena site visit kora beche report toh 20th October, 2021 dak te submit koribo,” koikena Meghalaya CM Conrad Sangma para khobor toh janaishe. Assam CM Himanta Biswa Sarma para koishe ke, “border issues te shanty aro morom thakibo nemite H CM Meghalaya Sri SangmaConrad logot virtual meeting thakishe. Olop din akhe te state te 6 Regional Committees formed korikena thakai khan para border te complete joint inspections korikena October 20 darik dak te report janai thiboli fesla korishe.”