Guwahati, May 9 : Arunachal Pradesh laga Chakma aro Hajong jati laga organization Chakma Hajong Rights Alliance (CHRA) para koisey ki Arunachal laga Chief Minister Prema Khandu para Chakma-Hajong mamla laga resolution(haal) tu Arunachal Pradesh laga bhitor te he pabo koikina safai nidiya tak tu taikhan para sarkar logotey eku dialogue(kotha kora) te bhak nolobo.
CHRA para 1996 te Supreme Court para judgement diya ke pura manikina Chakma aro Hajong ke India laga manu huwa laga pura haak dibole koisey.
Taikhan para Chief Minister ke Arunachal Pradesh laga manu khan ke Arunachal Pradesh tu ekta tribal rajya asey aro etu nimitey etu ke bachaikina asey aro Chakma aro Hajong ke tatey hodai karney thakibole dibo naparey koikina gumrah nokoribole koisey.
CHRA laga hisap te Chakma aro Hajong khan ke resolution (haal) lagey dusra jaga te pathaidiya tu nalagey. Aro taikhan ke India laga manu ekta huwa laga pura right dibo lagey koikina koisey.
Taikhan para koisey ki Chakma khan tu etu jaga te thakikina 60 saal huwa pichetey taikhan ke dusra jaga te pathaidiya tu ekdam biya asey.
CHRA para koisey ki Chakma aro Hajong khan tu dusra jaga para polaikina aha nohoi hoilebi racial discrimination(taikhan laga jaat nimitey taikhan ke dusra khan para alag suluk kora) laga sikar hoikina asey kun para vote bi dhali asey.
CHRA para safa safi koisey ki etu 1996 laga Supreme Court judgement aro Chakma aro Hajong laga economic halat ke improve kuribole rasta bisaribole laga kotha tu Arunachal Pradesh laga rajya aro Union of India logotey bi kuribo parey. Kilemaney taikhan ke rajya sarkar laga development programme para alag kuri disey.
Chakma aro Hajong khan tu bisi saal para Arunachal Pradesh te thaki asey aro taikhan laga haak laga larai tu bisi saal para chuli asey..
